Numri i të shëruarve në Shqipëri nga COVID-19 ka shkuar në 76.
Ka qenë kryeministri Edi Rama, i cili nëpërmjet një postimi në rrjetet sociale, bën me dije se janë shëruar edhe 9 persona të tjerë.
Ndërkohë bilanci zyrtar i COVID-19 në vendin tonë është 259 të prekur, midis të cilëve 15 viktima dhe 76 të shëruar.
Në spitalin Infektiv ndodhen 79 persona, 7 prej të cilëve në terapi intensive, ku 4 janë intubuar.
Pjesa tjetër e pacientëve ndodhen në pavion në gjendje të stabilizuar shëndetësore.
Qyteti më i prekur është Tirana me 140 raste, i ndjekur nga Durrësi me 29 dhe Fieri me 23.
Mbrëmjen e djeshme, specialistja e ISHP, Silva Bino, tha Shqipëria është futur në pikun e epidemisë, duke marrë parasysh edhe periudhën e inkubacionit.
Autoritetet shëndetësore ndërkohë, vijojnë me thirrjet për respektimin e rregullave të higjienës, distancimit social dhe kufizimin e daljeve nga shtëpitë.
