Ka shkuar në 15 numri i të prekurve nga Coronavirusi në vendin tonë, teksa sot është shënuar viktima e parë.
Lajmin e ka bërë të ditur vetë ministrja e Shëndetësisë Ogerta Manastirliu, e cila në një lidhje live në Facebook, ku u shfaq së bashku me kryeministrin Rama, tha se deri tani janë testuar 238 raste të dyshuara.
Nga këto vetëm ditën e sotme janë kryer 84 testime , ku 50 prej tyre kanë qenë të stafit mjekësor dhe fatmirësisht të gjithë kanë rezultuar negative.
3 rastet që kanë rezultuar pozitiv janë persona të cilët kanë patur kontakte me ‘pacientin zero’.
“Janë 283 raste të testuar dhe 15 pozitive. 3 rastet janë persona që lidhen me rastin e parë me pacientin zero.
Në kampionin e parë të testimeve në spitalin e Durrësit, dua që të njoftoj që të gjithë testimet janë negative. Kjo do të thotë që të gjithë mjekët kanë vepruar sipas protokolleve.Ndërkohë që vijon kampioni i dytë i analizave edhe sa i përket pacienteve dhe familjarëve”.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
