Ditën e sotme ka shkuar në 539 numri i të prekurve nga Covid-19 në vendin tonë pasi në 24 orët e fundit janë shënuar 21 raste të reja, nga 253 teste të kryera.
Nga këto 11 janë në Shkodër, 4 në Tiranë, 4 në Krujë dhe 2 në Kurbin.
Listës së vendeve të prekura prej ditësh i është bashkuar edhe Kukësi që në mëngjes numëronte 9 raste, teksa pasditen e sotme janë konfirmuar edhe 2 raste të reja.
Sipas ABC News nga 40 tamponët e marra së fundmi në këtë qytet janë konfirmuar pozitivë dy raste, të cilët janë familjarë të infermieres së konfirmuar të martën me koronavirus në Kukës.
Deri në këto momente në të gjithë vendin janë kryer 5, 080 teste, nga të cilët 539 kanë rezultuar pozitiv, teksa në 24 orët e fundit janë shëruar 6 pacientë, duke e çuar numrin në 283, ndërsa jnë regjistruar edhe 26 viktima.
Në shërbimin infektiv aktualisht janë 35 të shtruar, 7 prej tyre në terapi intensive, ndërsa në spitalin COVID 2 “Shefqet Ndroqi”, janë 8 pacientë të shtruar, 4 në reanimacion të intubuar, ndërsa 4 prej tyre ndodhen në pavion.
