Gjatë këtij viti akademik janë regjistruar 139.043 studentë, rreth 5% më shumë sesa në 2018-ën.
Sipas të dhënave të INSTAT, numri i studentëve të regjistruar u zvogëlua nga mbi 160 mijë që ishin në vitin akademik 2014-2015 në 131 mijë në vitin 2017-2018.
Për studentët shqiptarë, degët e preferuara mbeten ato që lidhen me administrim biznesin dhe ligjet, shkruan ‘Monitor’.
Fusha e dytë me më shumë studentë të regjistruar është shëndeti dhe mirëqënia, ndërsa në vendin e tretë renditen degët e Inxhinierisë, Prodhimit dhe Ndërtimit.
Vijojnë më tej artet, shkencat sociale, gazetaria dhe informacioni.
Në fund renditen shkencat natyrore, për të cilat ka një rënie të theksuar të interesit.
Në krahasim me vitet e shkuara, fushat e shërbimeve dhe turizmi, kanë njohur një rritje të konsiderueshme.
Gjithashtu po preferohen në masë edhe degët që kanë lidhje me teknologjinë e informacionit dhe komunikimit.
