Policia e Tiranës ka arrestuar ditën e sotme 4 persona. Në një njoftim për mediat policia e Tiranës bën me dije se është arrestuar një 28-vjeçar me iniciale O.B, i cili ushtronte në mënyrë të vazhdueshme dhunë fizike dhe psikologjike ndaj nënës së tij.
Gjithashtu Policia njoftoi se ka vënë në pranga dhe tre persona të tjerë, të cilët kanë thyer rregullat e qarkullimit rrugor, ku njëri prej tyre shtetasi me iniciale S.L ka aksidentuar ditën e djeshme dhe një fëmijë 7-vjeçar.
Njoftimi i policisë
“Ushtroi dhunë fizike dhe psikologjike ndaj nënës së tij, arrestohet në flagrancë 28-vjeçari. Arrestohen në flagrancë edhe 3 shtetas të tjerë, për vepra të ndryshme penale. Nga specialistët për Hetimin e Krimit në Komisariatin e Policisë Nr.2, u bë arrestimi në flagrancë i shtetasit O.B., 28 vjeç, pasi në menyrë të vazhdueshme ka ushtruar dhunë fizike dhe psikologjike ndaj nënës së tij.
Specialistët e Qarkullimit Rrugor bënë arrestimin në flagrancë të shtetasve: M.P., 31 vjeç, pasi në rrugën “Papa Gjon Pali”, është kapur në flagrancë duke drejtuar mjetin në gjendje të dehur në masën 0.82 mg/l. S.L., 19 vjeç, pasi ditën e djeshme aksidentoi fëmijen e mitur me iniciale A.S., 7 vjeç, i cili ndodhet në spital, nën kujdesin e mjekëve. V.M., 47 vjeç, pasi në rrugën “Sulejman Delvina”, nuk i është bindur urdhërit të punonjësit së policisë për të bërë testin e alkolit, pasi dyshohej se drejtonte mjetin nën efektin e alkolit. Materialet i kaluan Prokurorisë së Rrethit Gjyqësor Tiranë, për veprime të mëtejshme“.
