Anisa Potka, mjeke pediatre në urgjencën pediatrike të Qendrës Spitalore Universitare “Nënë Tereza”, ka trajtuar një rast të pazakontë me një fëmijë 3-vjeçar që kishte gëlltitur 13 sfera metalike.
Duke u nisur nga ky rast, mjekja ka ndarë disa këshilla të rëndësishme për prindërit, lidhur me mënyrën se si duhet të veprojnë në situata kur fëmijët gëlltisin trupa të huaj. Ajo thekson se rreziku më i madh paraqitet kur objekti kalon në rrugët e frymëmarrjes, duke e bërë rastin më të vështirë për t’u menaxhuar dhe potencialisht më të rrezikshëm.
“Ky ishte një rast i rrallë, por kemi raste, 3-4 fëmijë në javë që paraqiten të cilët kanë gëlltitur trupa të huaj, siç janë lodrat. Rrezikshmëria më e lartë është kur trupi i huaj kalon në rrugët e frymëmarrjes pasi e bllokon atë. Trupat që gëlltiten por nuk kalojnë në rrugët e frymëmarrjes, me rrezikshmëri janë trupa magnetikë të cilët nëse janë të shumtë në numër, bëjnë tërheqje të mukozës duke çuar deri në shpim të saj. Të rrezikshme janë mjetet e mprehta metalike, gjithashtu bateritë që mund të çojnë në shpim të ezofagut”, shpjegon mjekja.
Ajo nënvizon se në disa raste, prindërit nuk e kuptojnë menjëherë se fëmija ka gëlltitur një objekt, dhe e marrin vesh vetëm kur fëmija shfaq simptoma alarmante si vështirësi në frymëmarrje apo humbje vetëdijeje.
“Ndodhin dhe raste të tilla që fëmija ka gëlltitur diçka dhe prindi nuk e ka parë, në këtë formë prindi e kupton në momentin kur fëmija shfaq shenjat e mbytjes, vështirësi e theksuar në frymëmarrje, fëmija bëhet ngjyrë blu që mund të shoqërohet me humbje të vetëdijes dhe prindi e kupton në moment”, thotë ajo.
Sa i përket mënyrës së trajtimit, Potka tregon se gjithçka nis me pyetjen ndaj prindërve dhe një ekzaminim të përgjithshëm, e më pas vijon me analiza të imazherisë për të lokalizuar trupin e huaj.
“Hapi i parë është anamneza, ne pyesim prindërit për çfarë dyshojnë, hapi i dytë është ekzaminimi objektiv pra vizitë e përgjithshme nga ku kontrollojmë frymëmarrjen, pastaj hapi i tretë është ekzaminimi imazherik, ku bëjmë një grafi për të parë praninë e trupave nëse janë apo jo prezent. Nëse trupi është në rrugët e frymëmarrjes ne bëjmë dhe konsultën me mjekun përkatës dhe trajtohen aty, nëse trupi pastaj ndodhet në traktin tretës, bëjmë shtrimin në pavionin e gastroepatologjisë. Kur trupi ndodhet në traktin tretës, ndodh që trupi të dalë dhe vetë kur trupi nuk është i rrezikshëm”, sqaron Potka.
Një tjetër situatë me rrezikshmëri të lartë është edhe gëlltitja e ilaçeve nga fëmijët, që sipas saj kërkon një trajtim të ndryshëm.
“Fëmijët gëlltisin edhe kur konsumojnë ilaçe, këtu trajtimi është në një formë tjetër. Bëhet shtrimi në Pediatrinë e Përgjithshme dhe trajtohen nga mjeku specialist. Janë shumë të rrezikshme, ndaj këshilla më e rëndësishme për prindërit është ti monitorojnë fëmijët gjithë kohën dhe mos ti lënë asnjëherë vetëm”, përfundon mjekja pediatre.
