Një ngjarje e rëndë që ka tronditur opinionin publik në Kavajë ka marrë një kthesë të papritur. Një vajzë 15-vjeçare ka tërhequr akuzat e abuzimit seksual ndaj babait të saj, Bledar Rokës, duke deklaruar se kishte gënjyer për shkak të zemërimit nga zbulimi i disa bisedave në telefonin e saj.
E reja kishte akuzuar më parë se babai i kishte abuzuar seksualisht me të për katër vjet rresht, duke filluar që kur ishte vetëm 10 vjeç. Sipas saj, abuzimet kishin ndodhur në shtëpinë e tyre, në mungesë të nënës dhe vëllezërve dhe motrave të saj. Këto pretendime të rënda bënë që psikologia e shkollës, ku vajza ishte shprehur fillimisht, të njoftonte autoritetet.
Pas denoncimit, policia e kishte arrestuar 48-vjeçarin, dhe Gjykata e Durrësit vendosi masën e sigurisë “arrest në burg” për të. Megjithatë, gjatë seancës gjyqësore, Bledar Roka kishte mohuar të gjitha akuzat.
Ngjarja mori një kthesë kur vajza deklaroi në polici se akuzat ishin pasojë e një reagimi të nxituar nga ana e saj. “Nuk është e vërtetë që babai ka abuzuar seksualisht me mua. Gënjeva pasi më gjeti disa biseda në telefon me një shok,” u shpreh ajo.
