Ditën e sotme u miratua propozimi francez nga parlamenti i Maqedonisë së Veriut, një lajm i mirë edhe për Shqipërinë, pasi i hap rrugën negociatave për në BE. Ky miratim është përshëndetur edhe nga Departamenti Amerikan i Shtetit, i cili shprehet se ky vendim vjen në një moment kritik për Maqedoninë e Veriut, Ballkanin Perëndimor dhe Evropën.
Sipas asaj që ka deklaruar Sekretari Amerikan i Shtetit, Anthony Blinken, në BE që përfshin gjithë Ballkanin Perëndimor, duke përfshirë Shqipërinë dhe RMV-në do të jetë më i fortë dhe më i begatë.
Në reagim, DASH përmend po ashtu se i njeh kompromiset e vështira që Maqedonia e Veriut është dashur përpara për ta çuar përpara vendin në rrugën e integrimit, por shtohet se identiteti kulturor i vendit dhe gjuha maqedonase njihen dhe respektohen.
“Shtetet e Bashkuara të Amerikës mirëpresin vendimin e marrë nga Parlamenti i Maqedonisë së Veriut për të vijuar me hapat e radhës në rrugën drejt integrimit në BE. Ne i njohim kompromiset e vështira që janë bërë në këtë proces, që njohin dhe respektojnë identitetin kulturor të Maqedonisë së Veriut dhe gjuhën maqedonase. Ky vendim vjen në një moment kritik për Maqedoninë e Veriut, Ballkanin Perëndimor dhe Evropën. Një BE që përfshin gjithë Ballkanin Perëndimor, duke përfshirë Shqipërinë dhe RMV-në do të jetë më i fortë dhe më i begatë. Tani është koha që të ndërtojmë momentum dhe të punojmë në hapat e ardhshëm.”
