Partia Demokratike mblodhi ditën e djeshme Këshillin Kombëtar, ndërsa situatat e pazakonta duket se nuk kanë munguar. Arben Ristani, një nga zërat kundër Bashës, ka treguar në emisionin “Të Paekspozuarit” nga Ylli Rakipi se një nga deputetët ka bërë një deklaratë të pazakontë. Ai tha se deputeti i ka thënë Bashës se „nëse humbte zgjedhjet për kryetar, ai mendon se duhet të japi dorëheqjen“.
Ristani tregoi ndër të tjera se në mbledhje ishte organizuar një grup që i kundërvihej Nishanit dhe Kadillit, ndërsa sipas tij Basha do e çojë partinë nga humbja në humbje.
“Kryetari sillet si fëmijë hileqar. Në bazë të statutit mbledhjen duhet ta thërrasë kryetari i Këshillit Kombëtar, në fakt e thirri Sekratari i Përgjithshëm. Në mbledhje kishin organizuar edhe një grup për t’ju kundërvënë Nishanit dhe Kadillit. Krijuan hilaritet të rëndomtë gjatë mbledhjes. Nuk ishin as anëtarë, është një grup që e mbledh Sekretari i Përgjithshëm, për të krijuar hilaritet. Gjatë fjalëve, unë personalisht i kërkova kryetarit të japë dorëheqjen, sepse po e çon partinë nga humbja në humbje. I’u referua një fjale të tijën ku ai i thotë Ramës, ma hodhe njëherë faji yt, ma hodhe dy herë, faji im. Mendova se do të japë dorëheqjen që mos t’ja hedhë tre apo katër herë. Ngrihet një nga deputetët e PD-së dhe thotë, kryetar nëse do të humbësh në zgjedhje për kryetar, unë mendoj se duhet të japësh dorëheqjen! Ai që ra në sy ishte një nxitim për të zhvilluar zgjedhjet në më pak se një muaj, duke krijuar pabarazi në garë. Tradita e Bashës është që kur ai humb ngrin, këtë herë ai nuk bëri as ngrirje. E mirë do të ishte të ndiqte traditën e vet, që të ngrinte. Po prap një deputete e partisë, thoshte i afruan zgjedhjet në qershor, sepse pengohet turizmi në korrik. Besoj jemi në rrugë të mbarë, Basha do ta çojë partinë nga humbja në humbje“, tha ndër të tjera Ristani.
