Në nisje të fushatës elektorale për zgjedhjet e vitit 2021, e gjithë qeveria dhe mazhoranca janë hedhur në garë, kush e kush të bëjë premtimet më të mëdha, me synimin e bërjen e sa më shumë votave.
Por më tepër se kush do tjetër duket se “thesin” e ka hapur ministri socialist i Rindërtimit, Arben Ahmetaj, i cili sot ka bërë disa premtime vërtetë të mëdha për banorët e zonave të goditura nga tërmeti i 26 nëntorit.
Duke folur për “Planin e Rindërtimit 2020”, ministri Ahmetaj, deklaroi se, një pjesë e mirë e banesave do të mbarojnë përpara Vitit të Ri.
“Një pjesë e mirë e banesave individuale mbarojnë më 31 dhjetor 2020. Kemi 92 objekte kolektive që duhen vlerësuar, shembje apo të tjera. Kanë nisur edhe ndërtimet që financohen nga qeveria turke. Brenda 15 tetorit hapen themelet e lagjes ‘5 maji’”,- premtoi sot Ahmetaj gjatë një konference të përbashkët shtypi me Kryeministrin Rama dhe ministren e Financave.
Sipas Ahmetajt, “janë edhe 2 mijë përfitues nga njësitë individuale. Janë 143 objekte arsimore që janë financuar nga buxheti i shtetit, në 33 objekte kanë filluar punimet, në 4 objekte pritet të nisin punimet, kemi 92 shkolla nga donatorët”.
Arben Ahmetaj theksoi se, qeveria ka parashikuar lëvrimin e disa parave që i ka shpërndarë për rindërtim.
“Qeveria ka akorduar 9.44 miliardë lekë, që do të shkojnë në duar të familjarëve, banesat e së cilëve janë me probleme të vogla ose mesatare. Ndërsa, 20 miliardë lekë janë shpërndarë.
Janë mbi 27 mijë familje që përfitojnë brenda tetorit 2020. Deri tani janë paguar mbi 19 mijë familje dhe në dorë familjet kanë marrë 5.4 miliardë lekë”,- shtoi më tej ministri Ahmetaj.
Nuk dihet nëse të gjitha këto zotime ministri Ahmetaj do të mund t’i realizoj sipas premtimeve brenda këtij viti, por ajo që është e qartë është fakti se me rindërtimin e banesave, qeveria është shumë prapa.
Janë me dhjetëra rastet kur qytetarët e zonave të goditura nga tërmeti po ankohen se po bëjnë një jetë të vështirë nëpër çadra, e po ashtu nuk kanë përfituar asnjë lloj ndihme nga shteti.
Por nga ana e saj, qeveria është shprehur disa herë se projektin e madh të “rindërtimit të zonave të goditura” e ka vënë në “rrugë të mbarë”.
Ndërkohë fundi i vitit nuk është shumë larg dhe pas tij do të vijnë shumë shpejt edhe zgjedhjet parlamentare të prillit 2021, prandaj maxhoranca socialiste është edhe nën efektin e këtij presioni që mund t’u kushtojë rrjedhjen e mijëra votave.
/GazetaReforma.com/
