Pas një periudhë gati dy javore pushimi, për t’i dhënë hapësirë ndeshjeve të kombëtareve për Ligën e Kombeve, Kategoria Superiore është rikthyer këtë të mërkurë në fushë me sfidat e vlefshme për javën e katërt. Siparin e këtij raundi, e hapi dueli i zhvilluar në Ballsh mes Bylisit dhe Tiranës.
Sfida e luajtur në stadiumin ‘Adush Muça’ u mbyll me barazimin spektakolar 2-2. Të parët që hapën serinë e golave ishin vendasit, të cilët gjetën rrugën e rrjetës në minutën e 15’ falë një veprimi mjaft të bukur të Përgjonit me roveshatë. Ky gol qëndroi në fuqi deri në minutat e fundit të ndeshjes. Gjithsesi në minutën e 83-të protagonist u bë Ndreca, i cili barazoi rezultatin me një parabël mbi portieri Hasanbelli, e më pas përmbysi shifrat vetëm 3 minuta para fundit të kohës së rregullt, duke i dhënë avantazhin Tiranës. Kur gjithçka dukej se po shkonte në favor të bardhebluve, ishte sërish një roveshatë që prishi planet e kryeqytetasve, ende pa fitore në këtë sezon të ri.
Këtë herë ai që shënoi ishte Ruçi, i cili në minutën e 5-të shtesë, vulosi barazimin 2-2 përfundimtar të kësaj sfide. Java e katërt e Superiores vijon me katër sfida të tjera: Skënderbeu-Teuta e Vllaznia-Egnatia këtë të mërkurë dhe Elbasani-Laçi e Partizani-Dinamo që luhen të enjten
