Në orën 11:00 është parashikuar të mblidhet sërish Këshilli Politik, ku i pranishëm do të jetë edhe kryeministri Edi Rama. Ky është takimi i dytë, pas atij të djeshmit, që Rama ulet në tryezë me përfaqësuesit e dy opozitave, parlamentare dhe jashtëparlamentare.
Partia Demokratike dhe Lëvizja Socialiste për Integrim kërkojnë miratimin në Kuvend të marrëveshjes së 5 qershorit, të arritur në këtë këshill, për të vijuar më pas me diskutimet për ndryshime të mundshme kushtetuese ku përfshihet hapja e listave. Por përballë janë deputetët e opozitës në Kuvend, të cilët kërcënojnë se nuk do të votojnë marrëveshjen nëse aty nuk përfshihet edhe hapja e listave të kandidatëve për deputetë.
Kryeministri Rama po përpiqet të marrë rolin e negociuesit në këtë situatë, duke e paraqitur ngërçin si konflikt midis dy opozitave.
Megjithatë, Gazment Bardhi i PD-së akuzoi dje Ramën se kërkon t’i shmanget miratimit të marrëveshjes së 5 qershorit dhe ndaj ka hyrë në lojën e ndryshimeve kushtetuese. Ndërsa kryeministri Rama pretendon se Partia Socialiste nuk i ka votat për të miratuar vetme ndryshimet në Kodin Zgjedhor, i cili do të zbatohet në zgjedhjet parlamentare të vitit 2021 dhe që është kusht kryesor për hapjen zyrtare të negociatave me Bashkimin Evropian.
Pavarësisht mbledhjes së sotme, palët kanë kohë deri më 30 korrik për të arritur një marrëveshje përfundimtare, pasi në këtë datë është edhe seanca e fundit e këtij sesioni parlamentar.
