Ish-ambasadori i SHBA në Tiranë, Donald Lu, u shfaq sot ndërmjet një mesazhi të Ambasadës Amerikane për 30-vjetorin e rivendosjes së marrëdhënieve mes SHBA-ve dhe Shqipërisë.
Ka qenë ambasada amerikane në Shqipëri, që ka publikuar mesazhin e ish-ambasadorit Lu, ndërsa ky i fundit ka zgjedhur një moment prekës për të kujtuar vitet e tij të punës në vendin tonë, teksa ka publikuar një foto duke u përqafuar me një të moshuar.
“Gjatë këtyre viteve kaluam shumë kohë duke punuar me reformën në drejtësi, luftën kundër korrupsionit dhe gjuetinë për peshqit e mëdhenj. Unë jam bindur që për sa kohë vendet tona ekzistojnë ne do të kemi gjithnjë një lidhje të veçantë mes popujve tonë. Gëzuar 30-vjetorin”, shprehet Lu në fund të mesazhit të tij.
Kujtojmë se Donald Lu ka qenë ndër ambasadorët kryesorë amerikanë që bindi palët për të votuar Reformën në Drejtësi.
Ai ishte ambasadori në Shqipëri nga 2015-12018, një vit i vështirë pas përplasjeve të forta për reformën në drejtësi dhe betejën antikorrupsion për kapjen e të ashtuquajturve “peshq të mëdhenj”. Do të ishte pikërisht ambasadori Lu që do të përmendte publikisht emrat e Adriatik Llallës dhe të Emiljano Shullazit nga bota e krimit, duke kërkuar që drejtësia të mos tërhiqet nga presionet në vendimet e saj.
