Partia Demokratike zhvilloi ditën e sotme zgjedhjet për kryetarin e ri të PD-së. Sipas rezultatit paraprak të zgjedhjeve, kryetari aktual Lulzim Basha rezulton fitues me 81% të votave.
Pak më herët në një deklarata për mediat kryetari i Komisionit Zgjedhor, Jemin Gjana deklaroi se pjesëmarrja e anëtarësisë ka qenë në nivelin 54.7% ose 41 mijë e 674 vota të vlefshme.
Basha ka grumbulluar 32 mijë e 882 vota, ndjekur nga Agron Shehaj me 6 mijë e 38 vota, Edith Harxhi me 991 vota dhe Fatbardh Kadilli me 763 vota.
Nga të dhënat paraprake, rezulton se Basha ka fituar në çdo qendër votimit të numëruar deri më tani, përveç Selenicës ku fitues ka dalë Shehaj me 17 vota më shumë se kryetari aktual.
Kujtojmë se zgjedhjet brenda Partisë Demokratike kanë nisur në orën 08:00 të mëngjesit të sotëm, ndërsa demokratët votojnë për të zgjedhur kryetarin e ri të PD-së.
Pas humbjes në zgjedhjet e 25 prillit, pakënaqësitë brenda Partisë Demokratike janë rritur, me shumë figura që kanë kërkuar dorëheqjen e Lulzim Bashës. Përballë tij në garë do të jenë sot Edit Harxhi, Agron Shehaj dhe Fatbardh Kadilli.
Zgjdhjet mbahen brenda një kohe të shpejtë, ku kandidatët kanë zhvilluar fushatë gjatë tre javëve të fundit. Kadilli, Harxhi dhe Shehaj kanë deklaruar vazhdimisht se kjo ka qenë një garë e pabarabartë.
Basha, Shehaj dhe Kadilli kanë votuar ditën e sotme në selinë e PD, ndërsa Edit Harxhi ka votuar në njësinë nr.5.
