KLSH ka dhënë alarmin se rezervat e shtetit janë bosh. Shumë materiale mungojnë dhe shumë të tjera janë në sasi minimaliste…
Shqiptarët do të jenë në mëshirë të fatit në rast fatkeqësie natyrore. Teksa dimri po afron dhe historitë me përmbytje kanë qenë të dhimbshme, rezervat e shtetit janë bosh. Teksa miliona euro shkojnë për tenderë dhe në xhepat e zyrtarëve, në magazinat e rezervave të shtetit nuk ka grurë, naftë, ujë, miell apo ushqim për kafshët.
Alarmi është dhënë nga Kontrolli i Lartë i Shtetit, i cili ka konstatuar se ka shumë abuzime në këtë sektor dhe ata që e vuajnë në fund janë qytetarët. Nga auditimi që ka krye KLSH, përveçse mungojnë shumë produkte, ato që janë prezent, janë në gjendje shumë herë më të ulët sesa normalja, duke shkelur hapur ligjin.
Nëse i marrim me radhë, në rezervat e shtetit ka zero kilogram grurë, zero litra naftë, zero litra ujë mineral, zero mjete lundrimi, zero kontenjerë apo mjete të tjera strehimi, zero ushqim të kocetruar për kafshët dhe zero sasi bari apo ushqim tjetër për kafshët.
Sa i takon materialeve gjendje, ka vetëm 26 makina të tonazhit të rëndë nga 100 që duhet të kishte. Jastëkë nga 8 mijë ka afro 2 mijë. Po ashtu ka diferenca të madhe në çarçafë dhe krevate portativë apo dyshekë. Nga 400 ton miell që duhej të kishte në rezerva, ka vetëm 1.4 ton. Kripë nga 5 ton, ka vetëm 800 kg. Makarona nga 70 ton që duhej të kishte ka vetëm 20. Sheqer nga 80 ton që duhej të kishte ka vetëm 21, etj. Pra duket se rezervat janë bosh dhe nëse vendi përballet me fatkeqësi të mëdha, do të duhet sërish kryeministri të dalë dhe të lypë nëpër dyert e Evropës, pasi qytetarët do mbeten në mes të askundit.
“Gjatë periudhës së auditimit deri në fund të vitit 2022, nga 22 artikuj, 20 prej tyre janë me diferenca, mungesa jo vetëm te gjendja orientuese e mallrave (sasia) por edhe nën vlerat e limiteve minimale të përcaktuara në VKM nr.1128 datë 05.08.2008 “Për krijimin dhe administrimin e mallrave rezervë materiale shtetërore”, e ndryshuar. Për artikujt e Grupit C, vërehet se: Gjendja orientuese e mallrave dhe limiti minimal është mbajtur në të njëjtat kritere (normativa), që prej vitit 2008; Diferencat nga limiti minimal për një pjesë të konsiderueshme mallrash janë të ndjeshme”, shprehet KLSH.
Një tjetër konstatim i KLSH është se edhe ato pak materiale që janë aty, nuk ruhen fare në kushtet e duhura.
“Kushtet e ruajtjes së mallrave të sekuestruar dhe konfiskuar jo në të gjitha rastet ishin optimale, kjo për shkak të mungesës së investimeve për rikonstruksionin dhe mirëmbajtjen e magazinave të shfrytëzuara. Gjithashtu një pjesë e konsiderueshme e mallrave kryesisht veshje, apo mallra të konfiskuara, ishin të pa-paketuara dhe nuk paraqiteshin në gjendeshin në kushte optimale për përdorim. Ndërkohë automjetet ishin të përhapura në të gjithë territorin rreth magazinave kryesor. Për ato të kategorizuara për skrap periudha e gjatë nën efektin e agjentëve atmosferikë e kishte përshpejtuar së tepërmi amortizimin e tyre. Kjo situatë paraqitej thuajse në të gjitha DRRMSH-të, si rezultat i mos përfundimit ende të procedurave të shitjes së tyre. Mosveprimi në kohë krijon mbingarkesa të panevojshme për stafin e rezervës materiale në drejtim të administrimit të mallrave por edhe ndikon negativisht në përfitimet që mund të vijnë nga shitja në kohë e tyre”, shprehet KLSH.
Po ashtu ka shkelje me pasuritë e paluajtshme, me nxjerrjen e akteve nënligjore, me mirëadministrin, etj. /Pamfleti
