Termat Antike të Durrësit, të zbuluara në vitet ’60, mbeten një nga monumentet arkeologjike më të nënvlerësuara të qytetit për shkak të kushteve të papërshtatshme dhe mungesës së vëmendjes.
Ato ndodhen nën Teatrin “Aleksandër Moisiu”, i cili bashkëjeton prej dekadash me këtë monument, ku dhjetra kolona të larta deri në 10 metra mbajnë mbi shpinë një pjesë të godinës së teatrit. Ndërkohë që teatri po i nënshtrohet një restaurimi të financuar nga Bashkia dhe Ministria e Kulturës, Termat Antike mbeten në hijen e tij dhe nuk janë pjesë e programeve të shumicës së grupeve turistike për shkak të kushteve të papërshtatshme për vizitë.
Sipas guidës turistike Bjord Xhafa, shkallët e vështira për t’u zbritur dhe shkurret që mbulojnë pjesën e monumentit, si dhe mungesa e ndriçimit, e bëjnë vizitën në Termat një sfidë. Termat u zbuluan në vitet ’60 nga profesori Vangjel Toçi dhe kanë qenë pjesë e zbulimeve të rëndësishme arkeologjike, përfshirë mozaikun e famshëm “Bukuroshja e Durrësit” dhe Amfiteatrin.
Restaurimi i Teatrit “Aleksandër Moisiu” është parashikuar të kushtojë rreth 5 milion euro, shumicën e të cilave do të financojë Bashkia e Durrësit. Megjithatë, kolona që mbajnë monumentin arkeologjik do të mbeten të paprekura. Arkeologët dhe studiuesit shprehen të shqetësuar për mungesën e kujdesit për gjendjen e kolonave dhe për nevojën e një restaurimi të mëtejshëm që mund të përfshijë edhe Termat Antike.
Arkeologu Eduard Shehi theksoi se kolona të ngritura në mënyrë të çrregullt për të shmangur dëmtimin e monumentit, si dhe elementët e godinës që datojnë nga vitet ’60, janë një pasuri që kërkon më shumë vëmendje dhe ndërhyrje. Pjesëmarrësit e teatrit dhe artistët e veteranë si Aishe Stari dhe Haxhi Rama kujtojnë periudhën e zbulimit të Termave dhe shqetësohen për ruajtjen e këtij monumenti të çmuar për brezat e ardhshëm.
