Reshjet e shiut kanë përfshirë vendin tonë gjatë gjithë mbrëmjes së djeshme. Këto kanë sjellë sërish probleme në disa prej qyteteve dhe fshatrave.
Fryhet përroi i Zaranikës dhe rrezikon të dalë nga shtrati për shkak të reshjeve. Përroi kalon shumë pranë dy lagjeve duke i rrezikuar përmbytjen.
Ndërkohë edhe lumi Shkumbin ka pësuar rritje të nivelit të ujit ku ka dhe shumë prurje.
Edhe ditën e djeshme reshjet e shumta të shiut kanë shkaktuar shumë problematika. Lumi Ishëm doli nga shtrati e për pasojë dhjetra hektarë tokë bujqësore u përmbytën në fshatrat Murqinë, Mallkuç dhe Bilaj.
Ndërkohë, si pasojë e motit të keq është shtyrë nisja e trageteve nga Bari në portin e Durrësit dhe anasjelltas. Në lumin Drin e Mat janë rritur prurjet, por nga sa raportohet deri tani nuk përbëjnë rrezik për të dali nga shtrati, Në Lezhë, problem është furnizimin me energji elektrike, ndërsa në Finiq një urë e kanalit ujitës është ndarë në dysh.
Përsa i përket qarkullimit në akset kombëtare, probleme ka pasur në Ura e Kranës Syri i Kaltër, Lukovë-Bunec, Librazhd-Elbasan, në Kalimash km 107 dhe Shkopet-Ulëz. Në këto rrugë ka pasur rrëshqitje dherash dhe gurë.
Në rrugën e Dardhës, për shkak të temperaturave të ulëta rekomandohet që nga km 6 deri në km 12 të qarkullohet me zinxhirë. /Gazetareforma.com/
