Mëngjesi i kësaj fundjave ka sjellë dëborë në të gjitha fshatrat malorë të Qarkut të Elbasanit.
Dëbora ka mbuluar fshatrat në lartësitë mbi 900 metra mbi nivelin e detit dhe vazhdon të bjerë me intensitet të lartë.
Trashësia më e madhe e dëborës është regjistruar në fshatrat e Njësisë Administrative Steblevë, si dhe në fshatrat Qarrishtë dhe Rrajcë.
Ndërkohë, në zonat e ulëta bie reshje shiu, dhe temperaturat kanë rënë ndjeshëm.
Për shkak të kushteve të motit të keq, disa lagje në fshatrat malorë po përballen me ndërprerje të furnizimit me energji elektrike.
Po ashtu, në fshatin Pobrat të Elbasanit, reshjet e dendura kanë shkaktuar rrëshqitje dherash dhe gurësh, duke vështirësuar qarkullimin në një segment të rrugës rurale.
Për shkak të vazhdimit të reshjeve, ndërhyrja për pastrimin e rrugës është e pamundur për momentin.
Qarkullimi në këtë aks rrugor në një situatë të tillë mbetet i pamundur me automjete dhe i rrezikshëm edhe për këmbësorët pasi nga lartësitë bien gurë dhe herë pas here ka rrëshqitje të tokës.
