Situata me Coronavirus po rëndohet akoma edhe më shumë në shtetin e Kosovës. Shifrat e infektimeve po arrijnë numra rekord duke u shtuar çdo ditë edhe më shumë, madje vihet re dhe një rritje në numër e personave që kanë humbur jetën.
Edhe pse masat kufizuese janë shtuar, duke e bërë pothuajse të domosdoshme vaksinimin përsëri nuk shihet një ulje e rasteve por shifra ‘alarmante’ raportohen ditë pas dite.
Autoritetet në shtetin e Kosovës u bëjnë thirrje qytetarëve të kujdesen sa më shumë duke mos bërë të mundur përhapjen e coronavirusit.
Ministria e Shëndetësisë ka njoftuar se në 24-orët e fundit janë shënuar 2.236 raste pozitive me virusin Covid-19.
Gjatë kësaj periudhe nga koronavirusi kanë vdekur tetë persona.
Ndërkohë janë shëruar 138 të tjerë.
Njoftimi i plotë:
19 Gusht 2021: Ministria e Shëndetësisë, sipas të dhënave nga Instituti Kombëtar i Shëndetësisë Publike të Kosovës, informon:
Në 24 orët e fundit janë dhënë 22.119 doza të vaksinës kundër COVID-19.
Prej fillimit të vaksinimit në të gjitha qytetet e Kosovës janë dhënë 644.212 doza të vaksinës.
Deri më sot 221.026 qytetarë janë vaksinuar me dozën e dytë.
Nga 11.373 testime, 2.236 qytetarë kanë rezultuar pozitiv me virusin COVID-19.
Gjatë 24 orëve të fundit, janë shënuar 8 raste të vdekjes.
Sot janë shëruar 138 qytetarë, derisa numri i përgjithshëm i të shëruarve është 106.546.
Në total numri i rasteve aktive është 14.249.
