Charlie Kirk kishte refuzuar të vishte një jelek antiplumb ditën që u vra. Këtë e ka zbuluar bashkëshortja e tij, Erika Kirk, për “New York Times”, vetëm pak orë para funeralit të aktivistit të njohur konservator.
Sipas rrëfimit të saj, Kirk kishte hedhur poshtë edhe sugjerimin e një miku për të mbajtur fjalimin e tij në Utah pas një xhami të blinduar, duke u shprehur se kishte besim të plotë te ekipi i tij dhe se siguria në ambientet e universitetit do të ishte e garantuar.
Në intervistën për “New York Times”, Erika ndalet edhe te nata para sulmit fatal. “Besoj vërtet se ishte plani i Zotit. Është kaq i qartë”, u shpreh ajo, duke reflektuar mbi humbjen e bashkëshortit. Erika do ta shoqëronte fillimisht Kirk në eventin në Utah, por e ndërroi planin pasi nëna e tij kishte nevojë për trajtim mjekësor. Për këtë arsye, vendosën që ajo të mos udhëtonte drejt Utah-it, por të bashkohej me të më vonë në takimin e radhës që ai do të kishte në Universitetin Shtetëror të Kolorados.
E veja tregon gjithashtu se që prej ditës së tragjedisë nuk ka qenë në gjendje të prekë peshqirët që Kirk kishte përdorur në dushin e tij të fundit, dhe nuk ka hyrë më në dhomën e tyre të gjumit. Në një detaj prekës, Erika rrëfen se disa orë para funeralit vazhdon të mbajë në qafë varësen e burrit të saj, ende të njollosur me gjak, ashtu siç ai e kishte veshur kur u qëllua me armë.
