Në lidhje me situatën e tensionuar që është krijuar mes Kosovës dhe Serbisë ka reaguar dhe Bashkimi Europian.
Zëdhënësi i BE-së për Politikë dhe Siguri të Jashtme, Peter Stano, në një konferencë për media ka folur për vendosjen e reciprocitetit për targat të veturave që vijnë nga Serbia që mori Kosova sot.
Ai tha se tensionet duhet t’i ndalin të dyja palët dhe tha se dialogu duhet shfrytëzuar për të zgjidhur mosmarrëveshjet e tilla.
“Jemi duke vëzhguar situatën nga afër dhe dua të theksoj liria e lëvizjes është një kusht themelor i BE-së dhe këtë e presim edhe nga Kosova dhe Serbia që ta promovojnë atë. Ne u bëjmë thirrje të dyja palëve që të përmbahen dhe të reduktojnë tensionet. Menjëherë dhe pa ndonjë vonesë”, ka deklaruar Stano.
Stano ka thënë se Kosova dhe Serbia duhet të përdorin dialogun si platformën e vetme për të zgjidhur të gjitha çështjet e hapura që mund t’i kenë këto dy vende, përfshirë edhe lirinë e lëvizjes.
E ndërkohë kujtojmë se ky vendim është firmosur ditën e sotme nga Ministri i i Punëve të Brendshme, Xhelal Sveçla. Sipas këtij vendimi, është e detyrueshme që të gjitha automjetet që mbajnë targa të Serbisë dhe hyjnë në Kosovë të pajisen me targa të përkohshme. Po ashtu bëhet e ditur se pajisja me këto targa bëhet në të gjitha pikat kufitare të Kosovës. Ky vendim u prit me një valë trazirash dhe tensionesh në kufi ku dhe shumë qytetarë serb u përballën më forcat e Policisë së Kosovës.
