Presidenti Ilir Meta sumoi ashpër ditën e sotme përfaqësitë ndërkombëtare në vendin tonë, duke mos kursyer as SHBA-të.
Ky shpërthim i Metës është komentuar edhe nga “Zëri i Amerikës”.
“VOA” thekson se deklaratat e Metës e kanë marrë shtysën nga një deklaratë më herët e ambasadës së SHBA, ku thuhej se palët duhet të ndjekin opinionin e Komisionit të Venecias, për ngërçin me Gjykatën Kushtetuese.
Menjëherë zëdhënësi i Metës, reagoi me një gjuhë të ashpër ndaj ambasadorit italian, Alberto Cutillo, i cili njëlloj si SHBA kishte këshilluar palët të ndiqnin mendimin e Komisionit të Venecias, thuhet më tej në artikullin e VOA-s.
Gjithashtu “VOA” e ka cilësuar sulm ndaj SHBA-ve fjalët e zëdhënësit të Metës, Tedi Blushit.
Ky i fundit u shpreh: “Rruga e Elbasanit të çon në Elbasan dhe Rama e përdor dhe për në Xibrakë, lokalitet ku disa vite më parë u zbulua një laborator kokaine. Mjaft më “Rule of Embassy”. Është koha për ‘Rule of Law’ si çdo vend demokratik.”
Ndër të tjera Blushi tha se Komisioni i Venecias është porosi e Ramës për ndërkombëtarët, vijon më tej shkrimi.
Në fund përmendet edhe telefonata ndërmjet Metës dhe Zv. Ndihmës Sekretarit Amerikan të Shtetit, ku Meta iu drejtua SHBA-së, për të publikuar bisedën e plotë.
