Në Shkodër është konfirmuar për herë të parë në Shqipëri një rast i murtajës së të imtave, në një fermë në zonën e Postribës.
Lajmi u dha nga Drejtori i Përgjithshëm i Shërbimit Veterinar, Sulejman Kullolli, i cili sqaroi për News24 se ferma është vendosur menjëherë në karantinë dhe po merren masa për eliminimin e krerëve të prekur.
Sipas tij, zona rreth fermës do të izolohet në një rreze prej 3 deri në 10 kilometra, dhe është ndaluar çdo lëvizje kafshësh brenda territorit të Shkodrës dhe Malësisë së Madhe për të frenuar përhapjen e sëmundjes.
Kullolli theksoi se murtaja prek vetëm të imtat dhe nuk përbën rrezik për shëndetin e njerëzve. Ai garantoi se mishi dhe qumështi i prodhuar në këtë fermë nuk kanë dalë në treg dhe nënproduktet nuk përbëjnë rrezik nëse përpunohen në temperatura të larta.
Po ashtu, bëri thirrje për bashkëpunim me fermerët, duke i kërkuar të raportojnë çdo dyshim menjëherë tek shërbimi veterinar më i afërt.
Kontrollet në fermat e tjera po vijojnë, ndërsa deri tani nuk është konstatuar ndonjë vatër tjetër.
