Ndërkohë që festat e fundvitit po afrojnë dhe emigrantët shqiptarë janë dyndur në dogana për të festuar në vendin e tyre, kjo gjë ka shtuar riskun e shtimeve të rasteve me covid-19.
Situata duket dhe më shqetësuese kur kujtojmë se traditën shqiptare që familjet u kthejnë vizitat njëra-tjetrës gjatë festave.
Si pasojë ardhja e festave këtë vit mund të kthehet në një problem mjaft të madh në lidhje me gjendjen shëndetësore të vendit.
Për këtë shqetësim ka folur edhe specialistja e shëndetit publik në Mbretërinë e Bashkuar, shqiptarja Ardiana Gjini.
Gjini ka bërë një paralajmërim shumë të fortë për institucionet në Shqipëri dhe Kosovë. Ndër të tjera, specialistja tha se nëse dy vendet nuk vendosin masa kufizuese për festat e fundvitit, gjatë 5 javëve të ardhshme, do të përballen me një numër të madh të prekurish nga Covid-19.
“Si profesioniste jam shumë në merak se çfarë do të ndodhë në Shqipëri dhe Kosovë. Në Mbretërinë e Bashkuar janë rishikuar masat dhe janë vendosur masa shumë më të rrepta. Ne si ekspertë kemi kërkuar që këto masa të viheshin dy javë më parë.
Këtë brengë shumë të madhe si profesioniste e kam pasi është një rrezik shumë i madh për Kosovën dhe Shqipërinë nëse vazhdohet pa limitime, nëse vazhdohet ardhja e bashkëvendësve nga diaspora me një numër të pakontrolluar dhe pa masa kontrolli.
Jam vetë shqiptare dhe kam familje në Kosovë, do të doja shumë që të kalojë festat e fundvitit por rrezikun që do të sjellim virusin në Kosovë. Është e papërgjegjshme që të shkojmë në Kosovë dhe Shqipëri.
Mbi 9 mijë njerëz kanë mbërritur dje në aeroportin e Prishtinës. Për 5 javë do të jetë në kulmin e epidemisë sikur ishte para 3 javësh”, ka deklaruar Gjini.
Sa i përket vaksinës anti-covid specialistja Gjini tha se përtej optimizmit, vaksina mbetet ende një komponentët i vogël për kontrollin e virusit për shkak se nuk mund të prodhohen aq shumë për vaksinim në masë të popullsisë.
“Procesi i vaksinimit po shkon shumë mirë, është një prej programeve që ka dhënë motivim dhe kënaqësi të madhe. Ka një pritshmëri tejet pozitive në masën e personelit mjekësor por edhe nga popullata e përgjithshme, mirëpo më duhet të theksoj se vaksina është vetëm një prej komponentëve të vegjël për kontrollin e COVID-19 në 2-3 muajt e ardhshëm. Rezultati do të shihet 6-8 jave pas vaksinimit”, shtoi Gjini./Gazetareforma.com/
