Ditën e sotme në vendin tonë ka shkuar 89 numri i të infektuarve, teksa 13 raste të reja janë regjistruar gjatë ditës së shtunë, numri më i lartë që nga goditja e vendit tonë nga COVID-19.
Ndërsa ditën e premte janë regjistruar 6 raste të reja, çka do të thotë se numri i të prekurve është dyfishuar brenda ditës.
Kështu, i ftuar në News 24, mjeku Pëllumb Pipero ka folur rreth kësaj situate dhe ka bërë një përshkrim të frikshëm, duke thëne se java e ardhshme do jetë vendimtare dhe nëse nuk zbatohen masat e qeverisë i shkojmë nga pas skenarit italian.
Dyfishimi i numrit të të prekurve brenda një dite sipas mjekut nuk është një gjë normale dhe në këto kushte, të gjithë duhet të ndërgjegjësohen e të mbyllen në shtëpi, pasi vetëm kështu luftohet virusi.
“Pas cdo rasti të konfirmuar fshihen 10 apo 15 raste të tjera. Në këtë situatë pandemie dhe shtimit të rasteve të prekura iu kërkojmë qytetarëve të jenë mirëkuptues dhe të ndjekin udhëzimet e qeverisë. Ne mjekët shohim vetëm majën e ajsbergut, ndërkohë që ISHP ndjek rastet e kontaktit, ne mjekojmë rastet që na vijnë. Java që nis është deçizive për të parë edhe numrat edhe për të parë efektshmërinë e masava të marra. E përsëris, nga ky virus askush nuk është i paprekshëm, pavarësisht se dikush ka apo nuk ka komplikacione. Numri i rasteve është dyfishur në një ditë, pra sa më shumë të mos zbatojmë masat aq më shumë shtohen të prekurit. Minimalisht të qëndrojnë në shtëpi është shumë pak për të fituar shumë jetë njerëzish. Nesër do të jetë shumë vonë. Nesër i afrohemi një hap më shumë skenarit italian, por nëse qytetarët nuk na dëgjojnë, nuk kam ç’tju them më pastaj: Zoti na ruajtët.”, sqaroi ai.
Lidhur me rëndësinë e zbatimit të masave, “Corriere della Sera” ka publikuar një studim nga Universiteti i Standfordit, që ka mbledhur analiza, të dhëna dhe tendenca të ndryshme të COVID-19 në të gjithë botën, duke u përqëndruar tek gabimet dhe strategjitë që po miratohen.
Ajo që tregon analiza është se midis 23 dhe 24 janarit (që nga izolimi i Uhanit dhe mbyllja e 15 qyteteve në Hubei) numri i të infektuarve arriti kulmin dhe më pas filloi të bjerë dy ditë më vonë dhe numri i të prekurve u rrit në mënyrë eksponenciale për 12 ditë të tjera.
Ajo që mund të themi, me siguri, duke u nisur nga trendi i kurbës së infeksioneve është se izolimi i qytetarëve dhe masat ekstreme sjellin përmbajtjen e epidemisë dhe sipas “Corriere della Sera”, në fund të muajit Italia do të shohë rezultatet e para.
Kur do të fillojnë të japin efekt masat e rrepta dhe izolimi në shtëpi?
