Ambasadorja e Shteteve të Bashkuara në Tiranë, Yuri Kim ka reaguar në lidhje me raportin e publikuar nga Dhoma Amerikane e Tregtisë, i cili tregonte një rënie të besimit të biznesit në Shqipëri edhe për vitin 2020.
Me anë të një postimi të publikuar në Twetter diplomatja amerikane thotë se ekziston një lidhje e drejtpërdrejt e shtetit ligjor dhe biznesit. Ndër të tjera ambasadorja amerikane Yuri Kim e vendos theksin tek domosdoshmëria e një gjyqtari të “pastër” dhe vijimin e ndjekjes ligjore të korrupsionit, që “do të tërheqë më shumë investime amerikane dhe do t’u japë shqiptarëve një mundësi të mirë për të përparuar.
“Ekziston një lidhje e drejtpërdrejtë ndërmjet shtetit ligjor dhe biznesit.
Rregulla të qarta (përfshirë zgjidhjen përfundimtare të të drejtave të pronësisë), gjykata të pastra dhe ndjekja e vazhdueshme ligjore e korrupsionit do të tërheqë më shumë investime amerikane dhe do t’u japë shqiptarëve një mundësi të mirë për të përparuar”, shkruan ambasadorja amerikane në Tiranë Yuri Kim në Tëitter.
Ky është viti i dytë me rënie të Indeksit pas asaj të vitit 2019 kur rënia e besimit ishte 5 për qind. Në studim thuhet se Indeksi i Besimit në vitin 2018 ishte 43.16 për qind, ndërsa tani është 37.6 për qind. Ky është niveli më i ulët i Indeksit të Besimit që nga viti 2012, kur nisi kjo matje e përvitshme e cilësisë së klimës së biznesit nga Dhoma Amerikane e Tregtisë për anëtarët e saj, aktualisht 220 kompani vendase dhe shumëkombëshe.
