Pozita fiskale e Shqipërisë për vitin 2020 pritet të përkeqësohet me rritjen e parashikuar të deficitit në 8.5 përqind të PBB-së, raportoi sot Banka Botërore. Në Raportin për Shqipërinë, theksohet se rënia e aktivitetit ekonomik pritet të ulë raportin e të ardhurave tatimore ndaj PBBsë nga 25.7 përqind e PBB-së në 2019 në 24.1 përqind. “Të dy këta faktorë së bashku, të ardhurat e ulëta dhe deficiti i lartë fiskal, pritet ta rrisin borxhin publik të Shqipërisë në 81.4 përqind të PBB-së”, parashikon BB.
Perspektiva ekonomike dhe rreziqet
Duke supozuar se pandemia do të vihet nën kontroll deri në fund të vitit, sipas raportit, PBB-ja në vitin 2021 parashikohet të rikthehet në rritje me 5 përqind, për shkak të rimëkëmbjes së eksporteve, konsumit dhe investimeve.
Gjithashtu, vijimi i procesit të rindërtimit të strukturave të dëmtuara nga tërmeti pritet t’i japë hov rritjes ekonomike, siç ka ndodhur në situata të ngjashme në ekonomitë e tjera në zhvillim. Pas kësaj periudhe, rritja do të varet gjithnjë e më shumë nga konsumi privat, mbështetur nga rindërtimi pas tërmetit.
Investimet private dhe ato publike do të kontribuojnë gjithashtu pozitivisht në rritjen ekonomike për sa kohë që qeveria do të vijojë reformat për përmirësimin e klimës së biznesit dhe investimet në infrastrukturë. Sektori i shërbimeve, kryesisht ato që lidhen me turizmin, dhe sektori i ndërtimit pritet të jenë kontribuuesit kryesorë sektorialë në rritjen ekonomike.
Raporti i titulluar “Rimëkëmbje e pasigurt” fokusohet në përgjigjen e vendeve të rajonit ndaj COVID-19 dhe shqyrton konsekuencat makroekonomike dhe fiskale të pandemisë në të 6 vendet e rajonit, Bosnje dhe Hercegovine, Kosovë, Mali i Zi, Maqedonia e Veriut, Serbia dhe Shqipëria.
/GazetaReforma.com/
