Ish-kryeministri kosovar Ramush Haradinaj, është përfolur sot në mediat kosovare se, ka ushtruar dhunë fizike ndaj bashkëshortes së tij Anita Haradinaj.
Lajmi ka “marrë dhen” dhe ka trazuar jo pak mediat dhe opinionin në Kosovë, edhe pse më pas është aluduar se ka qenë një “fake news”, pasi është mohuar nga vetë Anita Haradinaj, e cila thotë se nuk ndodhet në Prishtinë, por në Durrës.
Lajmi i botuar fillimisht në portalin “Botasot.info”, ka trazuar mediat në Prishtinë me detajet që ka dhënë nga ngjarja që sipas portalit kishte përfunduar deri në urgjencën e Prishtinës dhe për të ishte implikuar edhe policia.
Sipas detajeve të publikuara nga portali “Botasot.info”, në Urgjencën e Qytetit në Prishtinë, është paraqitur e rrahur dhe e dhunuar, bashkëshortja e Haradinajt, Anita.
Sipas medias në fjalë, thuhej se Policia është njoftuar dhe ka shkuar edhe në shtëpinë e Haradinajt, ku ka marrë në pyetje çiftin se çfarë ka ndodhur.
Por çfarë ka ndodhur?
“Gazeta Express” ka marrë në telefon Anita Haradinajn, e cila thotë se, e ka lexuar artikullin e “Botasot”, por mohon që ndaj saj të jetë ushtruar dhunë.
Ajo thotë se, është në Durrës dhe jo në Prishtinë, dhe shton se kurrë, Ramush Haradinaj nuk ka ushtruar dhunë ndaj saj.
“Po e kam pa (raportimin). Së pari unë hiç s’jam në Prishtinë, jam në Durrës, e para e punës. Kështu që nuk janë të vërteta hiç, po nuk e di pse janë çu peshë. Edhe bash me ta thënë të vërtetën, prej kur jam martu unë, kurrë n’jetë s’ka ndodhë Ramushi me ushtru ndonjë lloj dhune. E s’po e di ku e kanë gjet forcën me bë kësi thashetheme banale. Sepse roli i medias, unë jam në media, i kam 21 vjet, nuk është me ba thashetheme”,- u shpreh bashkëshortja e ish-kryeministrit, Anita Haradinaj.
Por, Anita nuk ka as në plan të padisë median që ka nxjerrë lajmin.
“Nuk jam marrë me këtë punë hiç, për arsye se nuk m’u ka dukë as e arsyeshme, as interesante, m’u ka dukë kot.
Nuk është hera e parë që bëjnë (shkrime), duhet me mendu… E me ia nisë ashtu, duhet me nejtë nëpër gjykata me gënjeshtrat dhe rrenat, sidomos të ‘Botës Sot’”,- përfundoi ajo.
Ndërkohë që nga ana e Policisë së Kosovës dhe Prokurorisë, nuk ka asnjë përgjigje zyrtare mbi këtë ngjarje.
https://www.botasot.info/aktuale-lajme/1393730/zbulohen-detaje-te-reja-nga-incidenti-ne-mes-te-ramushit-e-anites/
/GazetaReforma.com/
