Sot është dita e katërt e fushatës elektorale dhe kryeministri i Shqipërisë, Edi Rama, ka zgjedhur që ta nisë ditën me një videomesazh. Në një video të publikuar në rrjetin social “Facebook”, kreu i qeverisë nuk e fsheh optimizmin për sigurimin e dozave të vaksinave anti-covid, ndërsa premton se deri në verë, jeta do t’i kthehet normalitetit.
Madje, jep shpresë të fortë edhe për turizmin në vendin tonë, ndërsa thekson se Shqipëria do të presë turistë nga e gjithë bota: “Kjo kohë që po e lëmë pas, ishte tejet e vështirë, por ne nuk jemi nga ata që dorëzohen, por e kundërta. I siguruam vaksinat kundër të gjitha parashikimeve, për pak muaj. Kjo vuajtje do të mbarojë shumë shpejt.
Shqipëria këtë verë do të presë turistë nga e gjitha bota. Hotelet, baret e restorantet, klubet, edhe në majë të malit do të jenë të hapura, pa orare kufizuese. Do të kthehemi përsëri në jetën tonë të dëshiruar dhe do të vazhdojmë me forcë e me shpejtësi përpara. Kemi kaq shumë punë për të çuar deri në fund, e plot të mira e gëzime për të ndarë me njëri-tjetrin. Shqipëria është e ardhmja jonë!”, thuhej në videomesazhin e kryeministrit Edi Rama.
https://www.facebook.com/edirama.al/videos/1128659010950409
