Tenderat e qeverisë janë shoqëruar shpesh herë me polemika, teksa nuk kanë munguar as akuzat për tendera të fshehta.
Mbrëmjen e djeshme në një intervistë për “Çim Peka Live”, lidhur me këto akuza, kreu i qeverisë deklaroi se çdo tender ka qenë dhe do të jetë transparent për publikun.
Madje, ai u zotua se duke nisur nga dita e sotme do merret vetë me këtë çështje dhe do publikojë të dhëna të sakta.
“Po ju jap fjalën që nesër, do të merrem vetë personalisht dhe do t’ju çoj të dhënat e sakta që lidhen me sa kanë qenë ofertat dhe si janë zhvilluar ngjarjet,”-tha Rama.
Mirëpo, duket se fjalët e Ramës i ka marrë era, pasi ende pa kaluar 24 orë, një tender është dhënë nga “Termocentral Vlorë” sh.a. me një vlerë maksimale prej 8 milionë lekësh të vjetra.
Sipas Dosja.al, detajet e tenderit, se kush ka qenë kompania fituese, apo të dhënat si oferta e saj nuk janë transparente, teksa dihet vetëm që është blerë mbushje për bombolat e gazit zjarrfikës.
Gara për të gjithë është hapur dje në orën 13:30 të pasdites dhe është mbyllur sot po në të njëjtën orë.
Sakaq, vetëm 20 minuta para se të hapej tenderi, APP ka njoftuar se ka patur një nevojë urgjente për të kolauduar bombolat dhe pas kësaj tenderi u hap.
24 orë mjaftuan për t’u bërë edhe gara, e më pas gjithçka u mbyll.
