Kryeministri Edi Rama u ka bërë thirrje qytetarëve që të vaskinohen sa më shpejt. Në një postim në Facebook, ku ka ndarë foto të qytetarëve që janë vaksinuar, Rama shkruan se vaksinimi nuk pret dhe bën thirrje që kushdo të vaksinohet në pikën më të afërt të vaksinimit, për të mbrojtur shëndetin e tyre dhe të njerëzve të dashur.
“Vaksinimi nuk pret!
Vaksinohu sa më parë në pikën më të afërt të vaksinimit. Mbroje shëndetin tënd dhe të njerëzve të dashur”, shkruan Rama.
Kjo nuk është hera e parë që kryeministri Rama e bën një thirrje të tillë. Herë pas here edhe zyrtarë të tjerë, mes tyre ministrja e Shëndetësisë dhe ekspertë të shëndetit publik u kanë bërë thirrje qytetarëve që të vaksinohen, teksa infektimet në vend kanë pësuar një rritje të ndjeshme për shkak edhe të variantit Delta.
Muaji gusht do të jetë muaj i hapur vaksinimi dhe kushdo mund të paraqitet në qendrën shëndetësore ose në qendrën më të afërt të vaskinimit me kartën e identitetit, për t’u vaksinuar.
Ndërkohë, ditën e sotme në Shqipëri janë shënuar 182 raste të reja infektimesh me koronavirus, një shifër kjo më e lartë në krahasim me ditën e djeshme kur raportoheshin 139 raste të reja.
