Qeveria tërheq projektligji për MEME-t. Kryeministri Edi Rama, i cili duke iu referuar kritikave të medias për këtë draft ende të pamiratuar, thotë se nuk ka asnjë shans që ‘MEME-t’ të ndalohen me ligj. Nuk ka një material zyrtar që ta parashikojë ndalimin me ligj të ‘MEME-ve’, shkruan Rama, duke nënkuptuar se ajo që është publikuar është një dokument jo zyrtar, që nuk qëndron.
Ministrja e Drejtësisë Etilda Gjonaj dje depozitoi pranë Komisioneve Parlamentare përkatëse draftin për Kodin e ri Penal, i cili parashikon dënim me burg dhe për personat që përhapin në internet montazhe për qëllime përfitimi.
Sipas draft projektligjit që ka qarkulluar, këto montazhe, apo siç quhen në zhargon ‘MEME’, në rast kur keqpërdoren nga personi që i bën, për qëllime përfitimi, kur do të dëmtojë reputacionin e personit që i bëhet MEME, apo dhe kur nuk përmendet shprehimisht se montazhi është i tillë, konsiderohet si kundërvajtje penale dhe dënohet deri në 1 vit burg.
Neni 238 i Kodit të ri Penal
Seksioni VIII “Veprat penale kundër të drejtave të njeriut, dinjitetit njerëzor dhe lirive themelore” parashikon sipas draftit se:
“Cenimi i imazhit të personit
Publikimi në çdo formë, mënyrë apo mjet i një montazhi të realizuar me fjalët ose imazhin enjë personi pa pëlqimin e tij, nëse kryhet për qëllime përfitimi material ose jo material, apo kur ka qëllim të dëmtojë reputacionin e një personi, kur materiali nuk shfaqet dukshëm që është një montazh ose nëse nuk përmendet shprehimisht se është i tillë, përbën kundërvajtje penale dhe dënohet me burgim deri në 1 vit.
Ndjekja penale fillon me ankim të viktimës ose përfaqësuesit ligjor të saj dhe pushon me tërheqjen prej saj”.
/GazetaReforma.com/
