Kryeministri Edi Rama ka takuar sot ministrin gjerman për Europën, Michael Roth. Në një konferencë të përbashkët, Rama tha se kjo vizitë përkon me një kohë të rëndësishme në prag të një takimi të KiE për një vendimmarrje në lidhje me Shqipërinë dhe Maqedoninë e Veriut. Rama deklaroi se Shqipëria i ka përmbushur detyrat dhe se BE duhet të hapë procesin e anëtarësimit.
“Kam nderin që të mirëprisja sot një mik të çmuar të Shqipërisë dhe shqiptarëve dhe një avokat të zëshëm të rrugëtimit Europian të gjithë rajonit tonë, edhe të Shqipërisë, ministrin gjerman të Shtetit për Çështjet Europiane. E dimë të gjithë se kjo vizitë përkon me një kohë të rëndësishme në prag të një tjetër takimi të Këshillit evropian për një vendimmarrje të rëndësishme të lidhur me Shqipërinë dhe Maqedoninë e Veriut. Sot nuk janë ata vetëm, por edhe ata që dje edhe nëse mendonin nuk e thoshin, që Shqipëria i ka kryer të gjitha detyrat e veta. Dhe miratimi i kornizës negociuese bazuar në vendimin e marrë për çeljen e negociatave nga KE dhe mbajtja e konferencës para ndërqeveritare, është thjesht çështje e brendshme e Këshillit Europian në një moment kur përtej faktit duket se ka një prirje më pozitive se sa herë tjetër së brendshmi. BE ndeshet nga një surprize të radhës nga bota ballkanike, që lidhet me ngërçin e Maqedonisë së Veriut dhe Bullgarisë. Unë nuk mund të përsërisja të njëjtën gjë që them me bindje dhe fakte, sipas meje, sipas nesh, që prej kohësh ne duhet të hapim menjëherë procesin dhe Be duhet të zbatojë vendin që ka marrë. Duke miratuar kornizës negociuese dhe duke thirrur konferencën e parë ndërqeveritare”, ka thënë Rama.
Më tej kryeministri deklaroi se nuk e di nëse kjo gjë do të ndodhë sepse varet edhe nga zgjidhja e ngërçit mes Maqedonisë së Veriut dhe Bullgarisë.
“A do të ndodh apo jo kështu, këtë nuk e di. Ne nuk e dimë. Kjo varet nga sa do të arrihet që të zgjidhet ngërçi mes Maqedonisë dhe Bullgarisë, që jo e fundit të heq barrikadën. Por ajo që është me rëndësi është se sidoqoftë ne sot kemi një mbështetje të zëshme nga të gjitha vendet, posaçërisht nga Gjermania për të ecur më tutje. Uroj shumë që në këtë sezon veror ne të kemi sa më shumë turistë nga Gjermania. I thash edhe ministrit që ndryshe nga çfarë mund të perceptohej duke lexuar deklaratat e ministrisë gjermane të Shëndetësisë, Shqipëria është vendi më i përshtatshëm në Europë për të ardhur për pushime. Meqë ra fjala, sot nuk ka më maska në rrugë në Shqipëri.”, tha Rama.
