Sot kryeministri Edi Rama ka kërkuar sërish ndihmën e gjithë qytetarëve, që teksa tentojnë të zgjidhin hallin e tyre, ta bëjnë atë përmes denoncimeve në portalin “Shqipëriaqëduam.al”.
Në këtë mënyrë sipas Ramës, nxirren jashtë radhëve të shërbimit apo drejtimit ata njerëz që nuk meritojnë të rrinë në ato detyra më.
Në fjalën e sotme gjatë bashkëbisedimit me qytetarë, Rama ka përmendur rastin më të freskët, atë të drejtorit të Hipotekës së Durrësit, që u denoncua mbrëmë nga një qytetar në Fiks Fare.
“U kërkoj të gjithë atyre që kanë hall, e që duan të zgjidhin hallin e tyre të na ndihmojnë edhe ne të trajtojmë hallin tonë të madh me njerëz të padenjë që nuk na mungojnë, si ishte edhe rasti i djeshëm i denoncuar nga Fiks fare, një drejtori që meriton vetëm një përcaktim, një halabak. Për të cilin është marrë masa e shkarkimit”- tha Rama.
