Kryeministri Edi Rama ndodhet në Kavajë ku veçse ka prezantuar kandidatët për deputetë në këtë qark, ka vazhduar me fjalimet e tij ideologjike. Rama ka thënë se e djathta tradicionale do të thotë anti-komunizëm e anti-fashizëm , ashtu sikundër edhe PS. Por PD sipas Ramës, nuk është e djathta tradicionale, është e djathta KÇK.
Ai më tej ka vazhduar të reklamojë investimet në qytetin e Kavajës, për të cilën ka thënë se tashmë është bërë një qytet mesdhetar, që mund të ishte shumë mirë në Itali e në vendet e Mesdheut.
“U bënë disa kohë që nuk kisha ardhur në qytet këtu në Kavajë, e sot kur erdha i vetmi ndryshim që pashë ishte një pallat mbi lulishte në qendër të Kavajës. Mjafton realisht të sjellësh ata në detyrë dhe pavarësisht se sa kohë i lë, aq kohë sa kanë do të bëjnë patjetër atë qe kenë bërë gjithmonë, më shumë keq se mirë, më shumë do të prishin punë e do të lënë pas gjurmë që më pas duhen mundim për t’i fshirë, se sa do të lënë gjurmë që duhen respektuar… Në Kavajë kemi dy njerëz, që janë dy ekstreme sa i përket rrugës nga kanë ardhur. Njëri është Etjeni që vjen nga një rrugë studimesh, ristudimesh pune në institucione dhe punës çdo ditë që të jetë më i denjë, për veten, familjen, vendin dhe ata që përfshihen në PS me ide të reja, e që sot janë pjesë e integruar e PS. Vahidi është një qytetar këtu, një qytetar i mirënjohur në Kavajë, si një njeri i mirë në kuptimin më të plotë, një njeri i gjendur për ata që kanë nevojë, një njeri i gjendur për ata që duan një shërbim. Nuk është i biri i dikujt me emër, vjen nga një histori tjetër nga ajo e Etjenit, vjen nga e djathta tradicionale në Kavajë. E djathta tradicionale do të thotë anti-komunizëm e anti-fashizëm, ashtu sikundër edhe PS anti-komusite dhe anti-fashiste. Ajo nuk është e djathta as tradicionale, ajo është e djathta KÇK. Kavaja, sot është në gjendje të bëjë diferencën, sepse Kavaja s’na e pat dhënë mundësinë të vije këtu, sepse këtu të gjithë të fusnin dy gishta në sy dhe nuk dije të ikje në shtëpi. Të futeshe këtu, ishte si një shteg në Palestinë. Unë pata ardhur një kohë njëherë, e ishte një tmerr, sikur hymë në një zonë lufte, mbledhur të gjithë pa punë, bingo nga të katër anët, një gjysmë errësirë e lukuni e kjo ishte liri demokraci, më shumë më ka bërë përshtypje qyteti i mbushur me plehra. Sot vjen këtu dhe sheh një qytet mesdhetar që mund të ishte shumë mirë në Itali, e vendet e Mesdheut, sepse këta jemi ne”, tha Rama.
