Pas zgjedhjeve të 25 prillit, kryeministri Edi Rama ka mbledhur deputetët e Partisë Socialiste, të rinj dhe të vjetër ditën e sotme. Rama në fjalën e tij ka bërë të ditur se pas fitimit të zgjedhjeve është momenti i duhur që të mblidhet Kongresi i Jashtëzakonshëm i PS-së. Rama ndër të tjera ka kujtuar edhe “ditëlindjen” e PS-së e cila në 12 qershor mbush plot 30 vite dhe sipas tij do të jetë momenti edhe për rifreskimin e kësaj partie. Ndër të tjera kryeministri ka treguar se qeveria e re do të formohet fill pas sezonit të verës, por puna do të nis që tani.
“Kongres të jashtëzakonshëm, por edhe të paraqesim edhe vizionin Shqipëria 2030. Qeveria e re do të formohet fill pas sezonit të verës, por puna do të nisë tani. Kongresi i Jashtëzakonshëm do të zgjedhë edhe asamblenë kombëtare kur do të hyjnë më të mirët. Jemi gati për ta braktisur llogoren e luftës së vjetër. Mandati i tretë nuk duhet t’i ngjajë në asnjë mënyre dy të parëve në marrëdhëniet me opozitën, sado që të na sulmojnë të na shajnë dhe të provokojnë nga legjitimimi i dhënë nga votuesit, nga mos gëlltitja e humbjes së tyre”, tha kryeministri i vendit Edi Rama.
