Pas arrestimit të Ilir Beqajt, pas abuzimit me fondet e BE-së, teksa mbante detyrën e kreut të SASPAC, kryeministri Edi Rama ka vendosur që të shkarkojë edhe pasuesen e tij në këtë post, Jona Sulin. Vendimi është marrë në mbledhjen e djeshme të qeverisë, ndërsa në faqen e kryeministrisë është postuar njoftimi për vendin vakant në këtë pozicion, ku janë dhënë edhe kushtet që duhet të plotësojnë aplikantët. Gara do të qëndrojë e hapur deri në datën 7 Gusht, ku më pas pritet që të bëhet publik dhe emri i drejtuesit apo drejtueses së re në krye të kësaj agjensie të rëndësishme.
Agjencia Shtetërore e Programimit Strategjik dhe Koordinimit të Ndihmës, u drejtua nga Beqajt, ndërsa pas nisjes së hetimeve ndaj tij, dhe vendosjes nën masën e sigurisë detyrim paraqitje, ish-ministri socialist u zëvendësua nga Suli, e cila më herët kishte mbajtur pozicionin e sekretares, në ministrinë që drejtohet nga Mirela Kumbaro.
Arsyet e shkarkimit të Sulit nuk bëhen me dije, megjithatë në këto muaj të ushtrimit të detyrës nga ana e saj, jozyrtarisht mësohet se ka pasur rezerva, qoftë nga zyra e kryeministrit, por edhe disa prej ministrave të qeverisë.
NJOFTIM PËR APLIKIM PËR FUNKSIONIN E DREJTORIT TË PËRGJITHSHËM TË AGJENCISË SHTETËRORE TË PROGRAMIMIT STRATEGJIK DHE KOORDINIMIT TË NDIHMËS
Në mbështetje të pikës 3, të nenit 102, të Kushtetutës, dhe të kreut III, pikat 1 e 2, të vendimit nr.642, datë 29.10.2021, të Këshillit të Ministrave, “Për krijimin, organizimin dhe funksionimin e Agjencisë Shtetërore të Programimit Strategjik dhe Koordinimit të Ndihmës”, të ndryshuar, Kryeministria shpall njoftimin për aplikim për funksionin e drejtorit të Përgjithshëm të Agjencisë Shtetërore të Programimit Strategjik dhe Koordinimit të Ndihmës.
Agjencia Shtetërore e Programimit Strategjik dhe Koordinimit të Ndihmës (në vijim, Agjencia) organizohet në nivel qendror dhe është në varësi të Kryeministrit.
Agjencia ka si mision koordinimin e ndihmës së huaj për programet e projektet zhvillimore, monitorimin e zbatimit të Stategjisë Kombëtare për Zhvillim dhe Integrim Evropian 2022-2030, ofrimin e mbështetjes metodologjike në hartimin e strategjive ndërsektoriale dhe sektoriale, me qëllim harmonizimin e tyre me SKZHIE-në, si dhe monitorimin e zbatimit të tyre, koordinimin e procesit të administrimit të projekteve me interes kombëtar, ofrimin e mbështetjes për institucionet e administratës shtetërore për rritjen e kapaciteteve në fushën programeve dhe të projekteve zhvillimore.
⦁ Aplikanti duhet të plotësojë këto kritere:
Të jetë shtetas shqiptar;
Të ketë zotësi të plotë për të vepruar;
Të ketë diplomë të nivelit “Master i shkencave” apo “Master profesional”, të përftuar në fund të studimeve të ciklit të dytë me 120 kredite dhe me kohëzgjatje normale 2 vite akademike, ose të barasvlefshme me të, sipas legjislacionit të arsimit të lartë, në shkenca sociale, inxhinierike, juridike, ekonomike;
ç) Të ketë përvojë pune jo më pak se 7 vjet;
Të dallohet për aftësi profesionale dhe cilësi të larta etiko-morale;
dh) Të mos jetë i dënuar me vendim të formës së prerë për kryerjen e një vepre
penale;
Ndaj tij të mos jetë marrë masë disiplinore e largimit nga puna, që nuk është shuar, sipas legjislacionit në fuqi.
⦁ Dokumentet që duhet të dorëzohen janë, si më poshtë vijon:
a) Kërkesë për aplikim;
b) Jetëshkrim (curriculum vitae) i kandidatit (secila faqe, e firmosur);
c) Kopje e diplomës së arsimit të lartë;
ç) Kopje e librezës së punës ose dokument i ngjashëm ose vetëdeklarim, për të vërtetuar përvojën e punës;
d) Vërtetim ose vetëdeklarim se nuk është larguar nga puna ose shërbimi civil me masë disiplinore ose që nuk ka masë disiplinore në fuqi;
dh) Formular të vetëdeklarimit (të plotësuar e të firmosur), në zbatim të ligjit nr.138/2015, “Për garantimin e integritetit të personave që zgjidhen, emërohen ose ushtrojnë funksione publike”, të ndryshuar;
e) Formular të aplikimit (të plotësuar e të firmosur) për informim për zyrtarët përpara emërimit/zgjedhjes në poste të larta, në zbatim të ligjit nr.45/2015, “Për të drejtën e informimit për dokumentet e ish-Sigurimit të Shtetit të Republikës Popullore Socialiste të Shqipërisë”;
ë) Çdo dokument tjetër shtesë, që provon përmbushjen e kritereve të përzgjedhjes, sipas përcaktimit të pikës 2, të kreut III, të vendimit nr.642, datë 29.10.2021, të Këshillit të Ministrave, të ndryshuar.
Inkurajojmë të gjithë të interesuarit, që përmbushin kriteret, të aplikojnë!
Afati i dorëzimit të aplikimit, deri më 7 gusht 2024.
Prokuroria e Posaçme kundër Korrupsionit dhe Krimit të Organizuar ka ngritur dyshime se ish-ministri Beqaj si drejtues i SASPAC, ka abuzuar me të paktën 8 procedura prokurimi nga agjencia për menaxhimin e fondeve të BE, duke fryrë shifrat në qindra mijëra euro drejt kompanive të ndryshme për shërbime të pakryera. Përfitues i parave ka qenë vetë ish-ministri dhe bashkëpunëtorët e tij, por SPAK nuk e ka një shifër ekzakte.
