Kryeministri Edi Rama në podcastin e fundit të tij për këtë sezon ka treguar eksperiencën e tij me jetën e natës. Ai tregoi për një rast kur shkoi në një disko në Prishtinë disa vite më parë dhe e përshkroi atë natë si të jashtëzakonshme.
Rama shprehet se në atë ambiente ndjeu nevojën e tij për të kërcyer lirshëm, “në kuptimin më të prekshëm të fjalës”. Për kryeministrin, kjo ishte një eksperiencë e jashtëzakonshme, duke i dhënë mundësinë të shijonte lirinë e kërcyerit dhe gëzimit në një mjedis argëtues dhe këndshëm si një disko.
“Në atë kohë më kujtohet kur kam shkuar për herë të parë dhe më pas, dy- tre herët e para në Prishtinë pas çlirimit ka qenë një jetë nate e jashtëzakonshme, një ekzaltim dhe një “shfrenim” në thonjëza se nuk kishte asgjë të shfrenuar në sensin negativ por një lulëzim i shpresës, një lulëzim i dëshirave, i nevojës për të jetuar së bashku, për të marrë frymë lirisht dhe kur shkoje nëpër ato lokale e madje njëherë më kanë marrë e më kanë çuar në një vend ku bëhej muzikë, një lloj diskoje që futeshe poshtë.
Unë nuk kam para kam shkuar, gjithë jetën time dy-tre herë jam gjendur në disko por aty e ndjeje këtë nevojën e të gjithëve për të kërcyer të lirë, në kuptimin më të prekshëm të fjalës. Ishte diçka e jashtëzakonshme.
Pastaj, sigurisht që gjërat fillojnë e normalizohen, njeriu është i bërë kështu që e keqja harrohet shpejt dhe e mira nuk ka fund, nuk është kurrë mjaft. Megjithatë, sidoqoftë, ato kanë qenë momente të paharrueshme e prandaj të pyeta”, u shpreh Rama.
