Kryeministri Edi Rama përplaset sërish me gazetarët për të ashtuquajturin ligji “Antishpifje”. Në përgjigje të pyetjes së gazetarëve, ka bërë me dije si ligji i medias do të kalojë dhe se e gjitha është bërë me rekomandime të OSBE-së. I ndodhur në një konferencë të përbashkët shtypi, me Ministren e Punëve të Jashtme e Suedisë, Ann Linde, kryeministri ka ndërhyrë, duke thënë se ky problem nuk i përket BE-së, por OSBE-së.
“Mos ngatërro OSBE me BE, ligji është i konsultuar një vit me OSBE dhe i miratuar nga OSBE, dhe po bëhet adoptimi i rekomandimeve të Komisionit të Venecias dhe ligji i medias do të kalojë, jo për t’i mbyllur gojën gazetarëve por që ato që janë në sulme të pabaza”, tha Rama.
Ministria Linde ishte pyetur pak çaste më parë, për situatën e azilkërkuesve në Suedi dhe për ligjin e Antishpifjes dhe duke i përmendur në raportin e KE-së vijonte të kishte vërejtje për ligjin e medias.
“Kur bëhet fjalë për azilkërkuesit ka një proces për këtë ne kemi pasur probleme nga disa vende të cilat kanë pasur kërkesa të pabazuara nëse nuk merr azil duhet të riatdhesohesh. Siç e dini Suedia është në mbrojtje totale. Suedia është mbrojtëse e lirisë së mediave. Qeveria të konsultohet me shoqërinë civile dhe gazetarët. Liria e medias është themelore në për një vend demokratik,” u shpreh ministrja.
Por kryeministri Edi Rama, nuk e pranoi pyetjen, duke korrigjuar gazetaren. “Si gazetare, mos gabo me një ministër të Jashtëm OSBE-në me Bashkimin Evropian”
Rikthimi i ligjit “Antishpifje”
Në fund të janarit, pasi ishte kundërshtuar nga gazetarët dhe presidenti e kishte kthyer ligjin e medias, Kuvendi shtyu votimin deri sa të shprehet Komisioni i Venecias.
Paketa ligjore antishpifje parashikon që AMA të shqyrtojë brenda 48 orëve ankesa të individëve, bizneseve, institucioneve, kur ato pretendojnë se ndaj tyre është shpifur, cenuar dinjiteti dhe privatësia nga mediat tradicionale dhe ato online. AMA merr të drejtën t’u vendosë gjoba që shkojnë deri në 8 mijë Euro, nëse mediat nuk reagojnë. AKEP hyn në lojë, kur ndaj këtyre mediave vendos pop ups që shfaqen sa herë klikohet në ëebsitet apo portalet e tyre. Në pop ups, që shfaqen sa herë dikush klikon, AKEP merr të drejtën të shkruajë që media ose portali në fjalë ka shpifur ose cenuar dinjitetin e individit, biznesit, institucionit. Në rast se media apo portali edhe pas pop ups nuk reagon, atëherë AKEP ka kompetencën që të mbyllë sinjalin edhe përmes operatorëve që ofrojnë shërbime interneti.
Në shtator, parlamenti ka futur në programin e punës ndryshimet në ligjin për mediat audio-vizive. Njoftimi riktheu shqetësimet për gjoba dhe ndërhyrje të autoriteteve ndaj gazetarëve, që e quajnë këtë nismë të qeverisë, si përpjekje të hapur për censurë. Programi i punës së parlamentit për 6 javët e ardhshme përfshin mes të tjerash edhe shqyrtimin e dekretit të Presidentit të Republikës, i cili ktheu për shqyrtim projekt- ndryshime dhe shtesa në ligjin “Për mediat audiovizive në Republikën e Shqipërisë”.
“Folëm për Bjellorusinë”
Kryeministri Edi Rama dhe Ministrja e Punëve të Jashtme e Suedisë, Ann Linde folën për kryesimin e radhës në OSBE që merret nga Suedia dhe për situatën në Bjellorusi.
“Sapo kemi përfunduar një takim shumë të dobishëm me ministres suedeze të punëve të jashtme, mund ta them me kënaqësi mike të çmuar e cila është këtu si kryetare e radhës e OSBE-së, pasi vitin e ardhshme Suedia merr kryesinë dhe njëkohësisht si një partnere e angazhuar e Shqipërisë dhe e Ballkanit Perëndimor në procesin e Integrimit, kemi folur për temat e OSBE-së, kemi prej disa muajsh një kontakt të vazhdueshëm dhe një bashkëpunim të shkëlqyer për të nxitur një dialog në Bjellorusi, por nga ana tjetër në funksion të stafetës së kryesimit, kemi një diskutim konstant mbi të gjitha temat, që janë jo të lehta për të cilat fatmirësisht ne kemi një qasje 100% të dakordësuar”, tha Rama.
