Kryeministri Edi Rama u ka bërë sërish apel mediave, që të tregohen të kujdesshme me raportimet.
Në një postim në rrjetet sociale, Rama u është drejtuar mediave, duke u thënë që të mos e detyrojnë që të bëjë atë që nuk ua pret imagjinata.
Kreu i qeverisë ka kërkuar që të verifikohen dhe të filtrohen informacionet.
Sipas tij, kjo është koha që populli të kurohet nga ana psikologjike dhe jo të ndjekë gënjeshtrat e medias.
Postimi i Ramës
APEL I DETYRUAR MEDIAVE
Gjatë periudhës së gjendjes së jashtëzakonshme të fatkeqësisë natyrore, Japonia ka masa ekstreme për mediat private, që mesa duket edhe në Japoninë e urtësisë së vjetër, paskan qenë taksirat mbi taksiratin e madh të tërmetit! Mos na detyroni të bëjmë atë që s’ua rrok imagjinata!
Filtroni informacionet dhe verifikoni ato që thoni! Menaxhoni debatet dhe ndaloni klithmat nëpër studiot tv dhe përfshihuni në qetësimin e shpirtrave të goditur më keq se banesat! Kontribuoni për të kanalizuar energjinë e jashtëzakonshme të solidaritetit mbarëshqiptar!
Kjo është koha për kurimin psikologjik të popullit që ju ndjek dhe jo për rrenat e shamatatë karakteristike të veprimtarisë së zakonshme të një pjese të madhe të sferës suaj!
Kujtojmë këtu se pak ditë më parë u proceduan penalisht dy administratorët e “JOQ Albania” si dhe u arrestua një vajzë, për përhapje paniku.
