Kryeministri Edi Rama do të zhvillojë nesër një takim me shqiptarët që jetojnë e punojnë në Greqi. Mediat greke kanë zbardhur axhendën, sipas të cilave raportohet se qindra efektivë të Policisë dhe sigurisë së Greqisë do të jenë në dispozicion për të siguruar kreun e qeverisë shqiptare gjatë qëndrimit të tij disa orësh në kryeqytetin grek.
“ELAS po merr masa shumë të rrepta sigurie për vizitën e nesërme të kryeministrit të Shqipërisë në Athinë, e cila do të nisë pas mbërritjes së tij në “El. Venizelos” në orën 8.30-9.00 të mëngjesit. Qindra punonjës policie (MAT, EKAM, OPKE, DIAS, Siguri, Qarkullim) do të jenë në dispozicion për të siguruar kalimin e qetë të Edi Ramës në vendin ku do të zhvillohet fjalimi i tij dhe për ta mbrojtur atë deri në momentin e largimit të tyre, me numri rritet ose zvogëlohet sipas nevojës”, shkruan Protothema.
Siç raporton Protothema.gr, Rama do të shoqërohet nga afërsisht 150 persona. Në këtë shoqërim do të jenë anëtarë të kabinetit të tij, deputetë dhe 50 gazetarë, të cilët do të shkojnë direkt në Teatrin e mbyllur të Krishtlindjeve të Galatsit. Aty janë ngritur dy salla për kryeministrin e Shqipërisë dhe bashkëpunëtorët e tij.
Fjalimi i tij do të mbahet rreth orës 11:00, por Kryeministri do të zhvillojë gjatë ditës edhe takime me bashkatdhetarë, anëtarë të partisë së tij dhe biznesmenë, si dhe pritet të shpërndajë broshurat për marrëdhëniet dypalëshe.
“Pas përfundimit të takimeve, Rama do të pijë kafe me kolegët e tij në Galatsi, ndërsa në orën 6.00-7.00 pasdite do të shkojë në aeroport për t’u larguar nga Athina”, përfundon shkrimin e saj Protothema.
Disa ditë më parë, Kryeministri grek Kyriakos Mitsotakis tha se vizita në Athinë e Ramës është e panevojshme, megjithatë shtoi se nuk mund ta pengojnë, pavarësisht thirrjeve të ndryshme që janë bërë nga grupe ekstremistësh. Pas Mitsotakis reagoi edhe Kryeministri Edi Rama, që theksoi se vizita e tij në kryeqytetin grek nuk ka lidhje me çështjet e brendshme të Greqisë, zgjedhjet për Parlamentin Europian apo ndonjë narrativë tjetër specifike që zgjon interesin e politikanëve grekë.
Kreu i qeverisë thotë se vizita e tij ka qenë e planifikuar prej kohësh dhe bëhet për t’u angazhuar me shqiptarët që jetojnë jashtë vendit e për të ndarë me ta krenarinë e atdheut dhe vizionin “Shqipëria 2030”.
