Kryeministri i Shqipërisë, Edi Rama shkruan se në korrik do të hapen regjistrimet për Akademinë e Re të Lidershipit. Rama thotë se kjo do të jetë për ata djem dhe vajza që duan të lexojnë, dinë të flasin dhe dëshirojnë të stërviten në grup për të zhvilluar aftësitë e tyre të komunikimit e vendimmarrjes.
Kushti që ka vendosur kjo akademi është që të rinjtë të mos jenë nën 16-vjeç por as mbi 26 vjeç. Kryeministri ka lajmëruar ndër të tjera se kërkesat mund të jenë të shumta, por ka pak vende të lira.
Njoftimi nga kryeministri Edi Rama
KUR DO FLASIM😍
Në korrik do të hapim regjistrimet e Akademisë së Re të Lidershipit për vajza e djem ambiciozë, sfidues, kokëfortë. Të rinj që duan të lexojnë e që dinë të flasin, po dhe të dëgjojnë. Të pakënaqur me si shkojnë gjërat përreth, po edhe me veten e tyre. Individë që dëshirojnë të stërviten në grup, për të zhvilluar aftësitë e tyre të komunikimit dhe vendimmarrjes.
Për këdo që e gjen veten në këta rreshta, që nuk është më pak se 16 vjeç e më shumë se 26 vjeç, e që dëshiron ta provojë mundësinë e vet për një vend në Akademinë e Re të Lidershipit, kjo është adresa:
https://liderakademi.al/
Kërkesa mund të ketë shumë, po vende janë pak. Prandaj kush aplikon duhet ta mbajë parasysh se ka më shumë gjasë të humbasë, se sa të fitojë! Por kush dëshiron dhe njëherësh ngurron, le të lexojë këto fjalë të Michael Jordan:
“Kam humbur më shumë se 9000 gjuajtje dhe thuajse 300 ndeshje. E kam humbur gjuajtjen e fitores 26 nga herët që ma besuan. Në jetën time kam dështuar herë pas here dhe përsëri. Dhe prandaj i’a kam dalë të kem sukses”.
