Njëri i bie gozhdës, tjetri patkoit. Kjo shprehje e popullit i shkon shumë mirë Ramës, Bashës dhe Metës. Ata replikuan sot me njëri tjetrin duke zgjedhur vetëm pjesën e debatit që iu intereson.
Kështu, kryeministri Edi Rama i ka kthyer përgjigje presidentit Ilir Meta, duke i thënë se nuk përfaqëson unitetin kombëtar.
“Ilir, ti je thjesht Komandant i LSI sepse Shqipëria nuk është në luftë dhe në kohë paqe Forcat e Armatosura nuk janë nën komandën e Presidentit të Republikës, i cili sipas Kushtetutës nuk komandon asgjë dhe askënd, po mishëron unitetin kombëtar dhe jo dasinë, sherrin, degradimin!”, shkruan Rama.
Ndërkaq, Presidenti Ilir Meta u pyet nga gazetarët nëse ishte kundër që qytetarët të mbajnë maska, apo vetëm ishte kundër që të gjobiteshin. Këtu ai u nda me qëndrimin e Kryemadhit, që është kundër maskës. Ai u shpreh se maska ka rëndësi dhe qytetarët duhet ta mbajnë, por duhet të kemi parasysh që disa qytetarë nuk kanë mundësi që t’i blejnë. “U bëj thirrje të gjithë qytetarëve të jenë sa më të kujdesshëm, të respektojnë të gjithë rregullat e vendosura nga autoritetet. Maskat kush ka mundësi ti blejë, por mos harrojmë që ka dhe nga ata që nuk kanë mundësi që të marrin maska. Jam kundër atyre që thonë se maska të mos mbahet, ti mbajnë”, tha Meta.
Ai kritikoi mbledhjen e gjobave nga OSHEE, por nuk mori përgjigje nga Rama.
“Çdo lloj mase që merret për arsye shëndetësore e çertifikuar nga ekspertët është e mirëpritur, por përmbajtja e aktit për gjobitjen e qytetarëve është maskaradë, sepse shkel në mënyrë flagrante të drejtat e qytetarëve, sepse e shndërron OSHEE në një kompani që ka për detyrë furnizimin me energji, në një instrument policor dhe ndoshta edhe elektoral, që ekzekuton në mënyrë të paligjshme gjoba “, deklaroi Meta.
Ndërkaq, Basha, pasi foli gjerë e gjatë për inceneratorët, iu drejtua Ramës: Vëri gishtin kokës, je përgjegjës për naftëtarët
Kreu i PD-së, Lulzim Basha është shprehur se kryeministri Edi Rama ua ka premtuar vetë naftëtarëve të Ballshit rrogat e prapambetura.
“Kjo e naftëtarëve është me të vërtetë diçka e tmerrshme, të mos pranosh negociatat me njerëz të cilëve iu ke premtuar dhe je shkaktar që nuk ke mbajtur premtimet prej vitit 2016 për rrogat e prapambetura nuk di çfarë emri t’i vësh”, tha Basha.
Për naftëtarët, Rama ka thënë sot në mëngjes se greva nuk është rruga e zgjidhjes. Ndërsa për inceneratorët publikoi një grafik ku tregonte efikasitetin e tyre në mbledhjen e më shumë mbeturinave se sa kur në pushtet ishte PD-ja.
I fundit u përzie në debat zëdhënësi i Presidentit Blushi, i cili deklaroi se Kryeministri “nuk ka të drejtë të zërë me gojë Kushtetutën që e ka përdhosur”.
/GazetaReforma.com/
