Jemi vetëm një ditë larg hyrjes në fuqi të ligjit për mbylljen e kazinove dhe pikave të Basteve dhe kryeministri Rama në daljen e sotme për median ka ritheksuar edhe një herë rëndësinë e këtij ligji.
Rama ka paralajmëruar gjithashtu të gjithë qytetarët që shkojnë kundër këtij vendimi do të përundojnë si bosat, duke iu referuar kështu Ervis Martinajt.
Martinaj njihet si një nga pronarët më të mëdhenj të kësaj industrie në vend. Megjithatë nuk kanë qenë vetëm qytetarët, por edhe policët ata që janë paralajmëruar.
Kryeministri ka thënë se duhet të tregojnë kujdes edhe uniformat blu që vendosin “të bëjnë një sy qorr”.
“ Kemi konstatuar ca përpjekje për të krijuar skema ilegale për të transferuar lokalet ku pronarët të përdorin skema të mbyllura. Po ju them të gjithë atyre që u kanë hyrë këtyre fantazive do të përfundojnë aty ku kanë përfunduar bosat e tyre.
Gjithë policia do të jetë në këmbë që prej nesër dhe ju lutem qytetarëve që të njoftojnë që prej nesër për çdo rast ku ato ndodhen.
Njësitë e lojërave të fatit janë të dokumentuara dhe nëse do të funksionojnë haptas ose mbylltas dhe nëse do të konstatohet nga qytetarët do të bjerë direkt mbi drejtuesit e policisë përgjegjësia. Ky është mesazhi që dha dje ministri i Brendshëm. Boll më me paratë e prindërve që derdhen në llumin e kumarit.
Pyetjes, po ata që mbesin pa punë u përgjigjem thjesht; vitin e ardhshëm kemi një rritje të kurseve të trajnimit profesional. Shumë nga ato njësi do të transferohen në biznese të tjera dhe do të krijohen vende pune. Benefitet janë të pallogaritshme”, ka thënë Rama gjatë fjalës së tij.
