Dy ditë më parë kryeministri Edi Rama, reagoi ashpër ndaj drejtorisë së Tatimeve. Ai emëroi në krye të drejtorisë së Tatimeve Delina Ibrahimajn, e ndërsa ngriti zërin ndaj luftës së informalitetit.
Rama tha se marrja apo dhënia e kuponëve tatimorë është rikthyer në nivele shumë të ulta, më keq sesa ka qenë më përpara.
Sipas kryeministrit, brenda pak ditësh do të niste sërish lufta ndaj informalitetit.
E mesa duket nuk ka vonuar as dy ditë nga fjala e tij, ku ka nisur aksioni ndaj informalitetit. Pak orë më parë, ka qenë vetë kryeministri që ka publikuar pamjet e një hoteli që u bllokua për këtë arsye.
Hoteli i bllokuar ndodhet në Llixha të Elbasanit, ndërsa është bllokuar për evazion.
Sipas “Report Tv”, hoteli është i ish-deputetit dhe kryetar i PD-së në degën e Elbasanit, Aurel Bylykbashi.
“A i’a vlen humbja që sjell bllokimi ligjor për përfitimet nga shkelja e ligjit?! Kushdo që shkel ende ligjin le t’i bjerë lapsit. Numërimi mbrapsht ka nisur dhe humbja do të jetë e rëndë për çdo shkelës”,shkruan kryeministri në rrjetin social Facebook.
Edhe ministrja e Financave, Anila Denaj, bëri të ditur se administrata Tatimore ka zbritur në terren.
“Nis zbatimin Plani Operacional kundër informalitetit, ku prioritet do të jetë kuponi tatimor, puna në të zezë dhe lëshimi i faturave”, është shprehur ministrja Denaj.
