Kryeministri Edi Rama ka konfirmuar në detyrë Elisa Spiropalin dhe Taulant Ballën, respektivisht si Ministre për Marrëdhëniet me Parlamentin dhe Kryetar i Grupit Parlamentar. Ai ka thënë se të dy e kanë merituar një falenderim të veçantë dhe konfirmimin në detyrë për mandatin e tretë me besimin e tij të plotë.
“Dua të falenderoj Ministren për marrëdhëniet me Parlamentin. Taulanti ka punuar me përkushtim, edhe në ditë tejet të vështira. Po ashtu dhe Elisa ka qenë e përkushtuar në rolin e saj jo të lehtë për bashkëpunimin e qeverisë me parlamentin. Që të dy meritojnë falenderim të veçantë dhe konfirmimin në detyrë për mandatin e tretë dhe do ta kenë besimin tonë të plotë”, tha Rama.
Një mesazh të veçantë ai e pati edhe për Gramoz Ruçin, për të cilin tha se do të jetë krahu i tij i djathtë. Rama tha se askush nuk mund ta zëvendësojë ish-kryeparlamentarin, ndërsa falenderoi deputetët që përfunduan mandatin e dytë.
“Ne do vazhdojmë të jemi një skuadër, duke filluar nga Gramozi që do vazhdojë të jeti krahu im i djathtë. Askujt të mos i vijë keq por nuk e zëvendësojnë. Ne jemi një skuadër dhe ndryshimet e roleve janë vetëm në funksion të skuadrës që do ja dalë të jetësoje vizionin e PS për Shqipërinë, duke qenë në gjendje të fitojë beteja dhe të jetë në krye të vendit. Nuk do të jetë asnjëherë e tepërt që të falenderoj deputetët që përfunduan punën e tyre të mandatit të dytë, duke dhënë kontributin në kuvend në periudhën e vështirësive të jashtëzakonshme”, u shpreh Rama.
