Para dy ditësh kryeministri Edi Rama premtoi rritje të pages mesate në vendin tonë si dhe një shpërblim prej 5 mijë lekesh për pensionistët në muajin prill. Teksa ndodhemi shumë pranë zgjedhjeve lokale, ish-presidenti Bamir Topi në emisionin për i ka cilësuar si deklarata qesharake, ndërsa i ka krahasuar 5 mijë lekët e reja për pensionistet me një thes miell.
“Zgjedhjet kanë ndryshuar shumë nga mënyra se si realizohen këto 30 vite. Mbaj mend që shkonim me thasë me miell dhe shkonin ata që ishin të lidhur me pushtetin ose individë me biznese. Çfarë është 50 mijë lekshi sot, nuk është as një thes miell. Nuk ka rëndësi vlera, por akti. Do ta konsideroja një gjë të shëmtuar. Nëse këto janë në debate shumë të forta me njëri tjetrin ky zotëria që është kryeministër duhet të kishte dhënë një imazh tjetër, për të shpalosur projekte”, tha ish-presidenti Topi.
Gjithashtu ish-presidenti tha se kryeministri Rama e di shumë mirë se si të luajë me situatat dhe t’i përdorë ato në favor të tij, duke shtuar se është e dukshme që ka marrë të gjitha pushtetet.
“Deklaratat për historitë e pagës mesatare është e njëjta logjikë si historia e pensioneve. Nëse do jetë njeri që duhet besuar pas zgjedhjeve lokale duhet të merret me pagën mesatare, apo rritjen e pensioneve. Është një histori e gjelit të detit, njerëzit gëzohen dhe mendon që me atë po kalon historinë. Rama është koshient në veprimet e veta dhe njeh shumë mirë nivelin e perceptimit në shoqëri. Në sytë tanë dhe zërit opozitar apo njerëzve që e analizojnë problemin ndryshe, sigurisht ky është një ofendim. Po të flasim për mënyrën e sjelljes së PS, mjafton ta përkufizojmë se pushtetet që dominohen nga PS janë në dorë e një njeriu dhe nëse do të bënim një analizë të standardit të jetesës duhet ta kishin realizuar vetë. Por çfarë të bëjmë në që opozita është në këtë gjendje dhe ai që është shkaktari kryesor, ai është kandidat i mundshëm që nesër pasi të bëhet kryetar zyrtar mund të pretendojë sërish për kryeministër. Këtu në Shqipëri nuk më duket asgjë e çuditshme. Unë mendimet e mia i kam dhënë, por duhet ta kuptojnë se ai në këtë qetësi ka sot, është si sigurt në qetësinë e tij. Njëri është shumë i sigurt në pushtetin që ka dhe tjetri është shumë i sigurt që nuk do të arrijë ndryshim. Nëse ka mungesë të shpresës, ajo vjen nga historia e opozitës. Nëse ai të merr qendrat e mëdha urbane, bashkitë e nivelit të dytë nuk të hyjnë farë në punë, në aspektin për fitore”, deklaroi ai.
