Kryeministri Edi Rama ka vënë theksin se përtej dëshirës së tij, bërja publike e marrëveshjes me Pfizer për vaksinat anti-COVID është e ndaluar nga vetë kompania.
Për përforcuar këtë deklaratë, Rama tha se deri tani asnjë vend i Bashkimit Europian apo edhe më gjerë, nuk e ka bërë një gjë të tillë. Madje ai shkoi edhe më tej duke sfiduar gazetarët në konferencë, që nëse do gjenin një shtet që e ka bërë publike, atëherë, Shqipëria do të ishte vendi i dytë.
Rama shtoi se qeveria i ka paratë e nevojshme për të vaksinuar të gjithë shqiptarët.
Kontrata me Pfizer është e mbrojtur në të gjithë botën nga sekreti tregtar, nuk bëhet publike, përtej dëshirës sime. Dëshira ime ishte që ta bëja publike, por kontratat janë kontrata, klauzola është aty. Nëse do të gjeni një vend të BE apo një tjetër që e ka bërë publike, ne do jemi vendi i dytë. Është lehtësisht e verifikueshme se paratë që paguhen për Pfizer nuk mbulohen nga sekreti. Nuk duhet ta ushqeni popullin me këto konspiracioni idiotësie. U mbush kjo botë me lloj lloj marrëzish. Është shumë e thjeshtë: Pfizer ka një kontratë me gjithë vendet dhe asnjëra nuk është publike. Unë këtë nuk e dija dhe thashë që do të bëhet publike në Parlament dhe më thanë që nuk bëhet sepse mbulohet nga sekreti tregtar. Nëse ju gjeni një vend që e ka bërë publike kontratën ne do të jemi vendi i dytë. I kemi paratë për të vaksinuar të gjithë shqiptarët”, tha Rama, gjatë një konference me gazetarët lidhur me fiskalizimin.
Një reagim i tillë vjen një ditë pasi Kuvendi miratoi tre aktet normative për sigurimin e vaksinës anti COVID. Ky votim në Kuvend u shoqërua me debate të shumta, nga deputetët e opozitës parlamentare, por edhe nga presidenca të cilët kërkonin transparencë. Si rezultati marrëveshjes, deri më tani, Shqipëria ka arritur të sigurojë 500 mijë doza vaksine, teksa procesi i vaksinimit që ka nisur aktualisht në ‘Air Albania’ po bëhet me vaksina të dhuruara nga një vend mik.
Ndërkohë, Kryeministri Edi Rama ka reaguar përsëri lidhur me deklaratës së Ambasadës Franceze në Tiranë, e cila është shprehur e habitur me reagimet e kryeministrit në lidhje me kritikat që i ka bërë BE-së, duke mos lejuar shpërndarjen e vaksinave për vendet e Ballkanit.
“S’kam bërë asnjë sherr me BE dhe s’më ndalon askush të jap opinionin tim. Shembulli im është OBSH, merreni se çfarë ka thënë për shpërndarjen e vaksinës, ka shkuar më larg se unë dhe ka thënë jemi në një katastrofë morale për njerëzimin. Unë s’mund të flas në emër të të gjithë njerëzimit, por nëse e shikoni të paarsyeshme që unë si kryeministri juaj të ngre zërin për ju, më vjen keq, por s’mendojnë si ti shqiptarët.
Fakti që ne s’jemi anëtarë të BE-së na bën që të rrimë me gojën mbyllur përpara një fakti të tillë. Është i qartë, unë nuk jam kryeministër i një vendi të BE por jam evropian, të paktën njësoj sa ata që flasin në emër të BE. Qenien time evropiane se ndryshon dot askush, as nëse jam kryeministër apo qytetar i lirë i këtij vendi që kam një zë.
Për dashurinë time për Francën dhe respektin unë mund të garoj me një francez dhe me ambasadoren. Vendimi i BE-së është i gabuar, ata gabojnë ne gabojmë. Ne kemi të drejtë të themi kur gabojnë me ne. Këtu është fjala për të mbrojtur njerëzit, dinjitetin.
Për të garantuar mbrojtjen e njerëzve se kam gjuhën e nënës për ta vënë në gjumë, pse shqetësoheni keni frikë se mos mërzitet BE. Dhe po të mërzitet ku është problem nëse kjo është e vërteta.
U la që të lihen jashtë aksesit në vaksinë vendet e rajonit. Ti ke hallin e BE-së tani, si duket kryeministri yt në sy të BE, kur thotë ndonjë gjë në sy të BE apo ke hallin që gjyshi dhe gjyshja jote të vaksinohet sa më parë?”, deklaroi Rama.
/Gazetareforma.com/
