Nënkryetari i PD-së Edi Paloka deklaron se kryeministri Edi Rama është i frikësuar nga opozita dhe paralajmëron humbjen e Partisë Socialiste në zgjedhjet e prillit.
Mesditën e sotme nga konferenca e përjavshme “ Ekonomia në Fokus”, Rama nuk la pa e kritikuar kryeopozitarin Lulzim Basha. Sipas tij programi ekonomik i paraqitur nga Partia Demokratike ngjason me natyrën e vet liderit, duke e cilësuar atë si dështuar dhe pa shtyllë kurrizore.
“Kam përshtypjen që është kohë e humbur të diskutojmë propozimet e PD-së pasi në tërësinë e vet programi i PD është si karakteri i liderit të PD, i dobët dhe pa shtyllë kurrizore, por sidoqoftë vlen në parim them që t’i përgjigjem pyetjes suaj sepse është një diskutim parimor që ndan qartësisht rrugët dhe alternativat tona. “, u shpreh ai.
Lidhur me këtë, nuk vonoi t’i përgjigjej Paloka, i cili me anë të një postimi në rrjetin social, Facebook, i përmendi Ramës lidhjet e tij me përdhunues e mafiozë.
“Eshtë më se e kuptueshme pse je i trembur nga Lulzim Basha. Ske faj. Te ka nxjerrë ashtu sic je para shqiptarëve dhe ndërkombetare një hajdut dhe bashkëpuntorë kriminelesh e përdhunuesish. Koha jote ka mbaruar. Më 25 prill ti humbet, Shqiperia fiton.”, përfundoi Paloka.
Kujtojmë se përplasjet mes Palokës dhe Ramës kanë qenë të vazhdueshme dhe mjaft të ashpra. Vlen të përmendim këtu hedhjen e bojës në parlament nga nënkryetari opozitar, lajm i cili mori vëmendje të gjerë mediatike. Ngjarja ndodhi gjatë kohës kur PD ende nuk i kishte djegur mandatet.
