Kryeministri Edi Rama, në kuadër të masave të marra për parandalimin e përhapjes së COVID-19, ka kufizuar lëvizjen e këmbësorve edhe brenda orarit 5:00-13:00, duke bërë që gjatë 24 orëve të lejohet vetëm një person të dalë nga shtëpia dhe leja do të merret online nëpërmjet një aplikacioni, ose me telefon.
Platforma për aplikimin, që do të jetë portal qeveritar e-Albania, u prezantua pak më pare duke shtuar në portal shërbimin e ri “leje për dalje”, ku mund të bëhet aplikimi dhe konfirmimi merret menjëherë me e-mail apo sms.
Ndërsa për ata që nuk disponojnë kompjuter apo smartphone, Rama tha se po punohet me kompanitë telefonike, ndërsa do të vendoset në dispozicion numri i telefonit 55155, por konfirmimi do të vijë pas 24 orësh.
Të moshuarit ndërkohë përjashtohen nga ky shërbim.
Gjatë fjalës së tij, Rama ka bërë me dije se sot i ka kërkuar kreut të Bashkisë së Tiranës, Erion Veliaj, që të marrë masa për të ndarë tezgat në tregjet e lagjeve, pasi sipas tij ato duhet të jenë larg nga njëra-tjetra, sepse nuk mund të krijohen radhë e grumbuj.
“I kam kërkuar kreut të Bashkisë së Tiranës që nga ky monent e deri nesër të mundësojnë ndarjen e të gjitha tezgave në tregjet e lagjes të jenë të ndara, që të mos të gjitha në një pikë dhe të kenë distanca, pasi krijohet radhë dhe grumbuj njerëzish. Pazaret mund të bëhen pa u futur të gjithë në një kanal aty, dhe besoj se nga nesër do jetë në zbatim. Por të njëjtën gjë ua kam kërkuar dhe kryetarëve të bashkive për tregjet e qytetet”, u shpreh Rama.
Sot ka shkuar në 186 numri i të prekurve nga COVID-19 në vendin tonë pasi gjatë orëve të fundit janë testuar 102 persona, 12 prej të cilëve kanë rezultuar pozitiv, ndërsa në total janë kryer 1,246 teste.
